১১. ৱলাহকসংযুত্তং

১. সুদ্ধিকসুত্তং

৫৫০. সাৱত্থিনিদানং. ‘‘ৱলাহককাযিকে ৱো, ভিক্খৱে, দেৱে দেসেস্সামি. তং সুণাথ. কতমে চ, ভিক্খৱে, ৱলাহককাযিকা দেৱা? সন্তি, ভিক্খৱে, সীতৱলাহকা দেৱা; সন্তি উণ্হৱলাহকা দেৱা; সন্তি অব্ভৱলাহকা দেৱা; সন্তি ৱাতৱলাহকা দেৱা; সন্তি ৱস্সৱলাহকা দেৱা – ইমে ৱুচ্চন্তি, ভিক্খৱে, ‘ৱলাহককাযিকা দেৱা’’’তি. পঠমং.

২. সুচৰিতসুত্তং

৫৫১. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পৰং মৰণা ৱলাহককাযিকানং দেৱানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচৰিতং চৰতি, ৱাচায সুচৰিতং চৰতি, মনসা সুচৰিতং চৰতি. তস্স সুতং হোতি – ‘ৱলাহককাযিকা দেৱা দীঘাযুকা ৱণ্ণৱন্তো সুখবহুলা’তি. তস্স এৱং হোতি – ‘অহো ৱতাহং কাযস্স ভেদা পৰং মৰণা ৱলাহককাযিকানং দেৱানং সহব্যতং উপপজ্জেয্য’ন্তি. সো কাযস্স ভেদা পৰং মৰণা ৱলাহককাযিকানং দেৱানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পৰং মৰণা ৱলাহককাযিকানং দেৱানং সহব্যতং উপপজ্জতী’’তি. দুতিযং.

৩-১২. সীতৱলাহকদানূপকাৰসুত্তদসকং

৫৫২-৫৬১. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পৰং মৰণা সীতৱলাহকানং দেৱানং সহব্যতং উপপজ্জতী’’তি? ‘‘ইধ ভিক্খু, একচ্চো কাযেন সুচৰিতং চৰতি, ৱাচায সুচৰিতং চৰতি, মনসা সুচৰিতং চৰতি. তস্স সুতং হোতি – ‘সীতৱলাহকা দেৱা দীঘাযুকা ৱণ্ণৱন্তো সুখবহুলা’তি. তস্স এৱং হোতি – ‘অহো ৱতাহং কাযস্স ভেদা পৰং মৰণা সীতৱলাহকানং দেৱানং সহব্যতং উপপজ্জেয্য’ন্তি. সো অন্নং দেতি…পে… পদীপেয্যং দেতি. সো কাযস্স ভেদা পৰং মৰণা সীতৱলাহকানং দেৱানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পৰং মৰণা সীতৱলাহকানং দেৱানং সহব্যতং উপপজ্জতী’’তি. দ্ৱাদসমং.

১৩-৫২. উণ্হৱলাহকদানূপকাৰসুত্তচালীসকং

৫৬২-৬০১. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পৰং মৰণা উণ্হৱলাহকানং দেৱানং…পে… অব্ভৱলাহকানং দেৱানং…পে… ৱাতৱলাহকানং দেৱানং…পে… ৱস্সৱলাহকানং দেৱানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচৰিতং চৰতি, ৱাচায সুচৰিতং চৰতি, মনসা সুচৰিতং চৰতি. তস্স সুতং হোতি – ‘ৱস্সৱলাহকা দেৱা দীঘাযুকা ৱণ্ণৱন্তো সুখবহুলা’তি. তস্স এৱং হোতি – ‘অহো ৱতাহং কাযস্স ভেদা পৰং মৰণা ৱস্সৱলাহকানং দেৱানং সহব্যতং উপপজ্জেয্য’ন্তি. সো অন্নং দেতি…পে… পদীপেয্যং দেতি. সো কাযস্স ভেদা পৰং মৰণা ৱস্সৱলাহকানং দেৱানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পৰং মৰণা ৱস্সৱলাহকানং দেৱানং সহব্যতং উপপজ্জতী’’তি. দ্ৱেপঞ্ঞাসমং.

৫৩. সীতৱলাহকসুত্তং

৬০২. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেনেকদা সীতং হোতী’’তি? ‘‘সন্তি, ভিক্খু, সীতৱলাহকা নাম দেৱা. তেসং যদা এৱং হোতি – ‘যংনূন মযং সকায ৰতিযা ৱসেয্যামা’তি [ৰমেয্যামাতি (সী. স্যা. কং. পী.) এৱমুপৰিপি], তেসং তং চেতোপণিধিমন্ৱায সীতং হোতি. অযং খো, ভিক্খু, হেতু, অযং পচ্চযো, যেনেকদা সীতং হোতী’’তি. তেপঞ্ঞাসমং.

৫৪. উণ্হৱলাহকসুত্তং

৬০৩. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেনেকদা উণ্হং হোতী’’তি? ‘‘সন্তি, ভিক্খু, উণ্হৱলাহকা নাম দেৱা. তেসং যদা এৱং হোতি – ‘যংনূন মযং সকায ৰতিযা ৱসেয্যামা’তি, তেসং তং চেতোপণিধিমন্ৱায উণ্হং হোতি. অযং খো, ভিক্খু, হেতু, অযং পচ্চযো, যেনেকদা উণ্হং হোতী’’তি. চতুপঞ্ঞাসমং.

৫৫. অব্ভৱলাহকসুত্তং

৬০৪. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেনেকদা অব্ভং হোতী’’তি? ‘‘সন্তি, ভিক্খু, অব্ভৱলাহকা নাম দেৱা. তেসং যদা এৱং হোতি – ‘যংনূন মযং সকায ৰতিযা ৱসেয্যামা’তি, তেসং তং চেতোপণিধিমন্ৱায অব্ভং হোতি. অযং খো, ভিক্খু, হেতু, অযং পচ্চযো, যেনেকদা অব্ভং হোতী’’তি. পঞ্চপঞ্ঞাসমং.

৫৬. ৱাতৱলাহকসুত্তং

৬০৫. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেনেকদা ৱাতো হোতী’’তি? ‘‘সন্তি, ভিক্খু, ৱাতৱলাহকা নাম দেৱা. তেসং যদা এৱং হোতি – ‘যংনূন মযং সকায ৰতিযা ৱসেয্যামা’তি, তেসং তং চেতোপণিধিমন্ৱায ৱাতো হোতি. অযং খো, ভিক্খু, হেতু, অযং পচ্চযো, যেনেকদা ৱাতো হোতী’’তি. ছপ্পঞ্ঞাসমং.

৫৭. ৱস্সৱলাহকসুত্তং

৬০৬. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেনেকদা দেৱো ৱস্সতী’’তি? ‘‘সন্তি, ভিক্খু, ৱস্সৱলাহকা নাম দেৱা. তেসং যদা এৱং হোতি – ‘যংনূন মযং সকায ৰতিযা ৱসেয্যামা’তি, তেসং তং চেতোপণিধিমন্ৱায দেৱো ৱস্সতি. অযং খো, ভিক্খু, হেতু, অযং পচ্চযো, যেনেকদা দেৱো ৱস্সতী’’তি. সত্তপঞ্ঞাসমং.

সত্তপঞ্ঞাসসুত্তন্তং নিট্ঠিতং.

ৱলাহকসংযুত্তং সমত্তং.