৪-১২. সাৰগন্ধাদিদাতাসুত্তনৱকং

৪৪১-৪৪৯. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পৰং মৰণা সাৰগন্ধে অধিৱত্থানং দেৱানং…পে… ফেগ্গুগন্ধে অধিৱত্থানং দেৱানং… তচগন্ধে অধিৱত্থানং দেৱানং… পপটিকগন্ধে অধিৱত্থানং দেৱানং… পত্তগন্ধে অধিৱত্থানং দেৱানং… পুপ্ফগন্ধে অধিৱত্থানং দেৱানং… ফলগন্ধে অধিৱত্থানং দেৱানং… ৰসগন্ধে অধিৱত্থানং দেৱানং… গন্ধগন্ধে অধিৱত্থানং দেৱানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচৰিতং চৰতি, ৱাচায সুচৰিতং চৰতি, মনসা সুচৰিতং চৰতি. তস্স সুতং হোতি – ‘সাৰগন্ধে অধিৱত্থা দেৱা দীঘাযুকা ৱণ্ণৱন্তো সুখবহুলা’তি. তস্স এৱং হোতি – ‘অহো ৱতাহং কাযস্স ভেদা পৰং মৰণা সাৰগন্ধে অধিৱত্থানং দেৱানং…পে… ফেগ্গুগন্ধে অধিৱত্থানং দেৱানং… তচগন্ধে অধিৱত্থানং দেৱানং… পপটিকগন্ধে অধিৱত্থানং দেৱানং… পত্তগন্ধে অধিৱত্থানং দেৱানং… পুপ্ফগন্ধে অধিৱত্থানং দেৱানং… ফলগন্ধে অধিৱত্থানং দেৱানং… ৰসগন্ধে অধিৱত্থানং দেৱানং… গন্ধগন্ধে অধিৱত্থানং দেৱানং সহব্যতং উপপজ্জেয্য’ন্তি. সো দাতা হোতি সাৰগন্ধানং…পে… সো দাতা হোতি ফেগ্গুগন্ধানং… সো দাতা হোতি তচগন্ধানং… সো দাতা হোতি পপটিকগন্ধানং… সো দাতা হোতি পত্তগন্ধানং… সো দাতা হোতি পুপ্ফগন্ধানং… সো দাতা হোতি ফলগন্ধানং… সো দাতা হোতি ৰসগন্ধানং… সো দাতা হোতি গন্ধগন্ধানং. সো কাযস্স ভেদা পৰং মৰণা গন্ধগন্ধে অধিৱত্থানং দেৱানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পৰং মৰণা গন্ধগন্ধে অধিৱত্থানং দেৱানং সহব্যতং উপপজ্জতী’’তি. দ্ৱাদসমং.