১৩-২২. মূলগন্ধদানূপকাৰসুত্তদসকং

৪৫০-৪৫৯. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চো কাযস্স ভেদা পৰং মৰণা মূলগন্ধে অধিৱত্থানং দেৱানং সহব্যতং উপপজ্জতী’’তি? ‘‘ইধ, ভিক্খু, একচ্চো কাযেন সুচৰিতং চৰতি, ৱাচায সুচৰিতং চৰতি, মনসা সুচৰিতং চৰতি. তস্স সুতং হোতি – ‘মূলগন্ধে অধিৱত্থা দেৱা দীঘাযুকা ৱণ্ণৱন্তো সুখবহুলা’তি. তস্স এৱং হোতি – ‘অহো ৱতাহং কাযস্স ভেদা পৰং মৰণা মূলগন্ধে অধিৱত্থানং দেৱানং সহব্যতং উপপজ্জেয্য’ন্তি. সো অন্নং দেতি…পে… পানং দেতি… ৱত্থং দেতি… যানং দেতি… মালং দেতি… গন্ধং দেতি… ৱিলেপনং দেতি… সেয্যং দেতি… আৱসথং দেতি… পদীপেয্যং দেতি. সো কাযস্স ভেদা পৰং মৰণা মূলগন্ধে অধিৱত্থানং দেৱানং সহব্যতং উপপজ্জতি. অযং খো, ভিক্খু, হেতু, অযং পচ্চযো, যেন মিধেকচ্চো কাযস্স ভেদা পৰং মৰণা মূলগন্ধে অধিৱত্থানং দেৱানং সহব্যতং উপপজ্জতী’’তি. বাৱীসতিমং.