৬. সম্মাসম্বুদ্ধসুত্তং

৫৮. সাৱত্থিনিদানং. ‘‘তথাগতো, ভিক্খৱে, অৰহং সম্মাসম্বুদ্ধো ৰূপস্স নিব্বিদা ৱিৰাগা নিৰোধা অনুপাদা ৱিমুত্তো সম্মাসম্বুদ্ধোতি ৱুচ্চতি. ভিক্খুপি, ভিক্খৱে, পঞ্ঞাৱিমুত্তো ৰূপস্স নিব্বিদা ৱিৰাগা নিৰোধা অনুপাদা ৱিমুত্তো পঞ্ঞাৱিমুত্তোতি ৱুচ্চতি.

‘‘তথাগতো, ভিক্খৱে, অৰহং সম্মাসম্বুদ্ধো ৱেদনায নিব্বিদা ৱিৰাগা নিৰোধা অনুপাদা ৱিমুত্তো সম্মাসম্বুদ্ধোতি ৱুচ্চতি. ভিক্খুপি, ভিক্খৱে, পঞ্ঞাৱিমুত্তো ৱেদনায নিব্বিদা…পে… পঞ্ঞাৱিমুত্তোতি ৱুচ্চতি.

‘‘তথাগতো, ভিক্খৱে, অৰহং সম্মাসম্বুদ্ধো সঞ্ঞায… সঙ্খাৰানং… ৱিঞ্ঞাণস্স নিব্বিদা ৱিৰাগা নিৰোধা অনুপাদা ৱিমুত্তো সম্মাসম্বুদ্ধোতি ৱুচ্চতি. ভিক্খুপি, ভিক্খৱে, পঞ্ঞাৱিমুত্তো ৱিঞ্ঞাণস্স নিব্বিদা ৱিৰাগা নিৰোধা অনুপাদা ৱিমুত্তো পঞ্ঞাৱিমুত্তোতি ৱুচ্চতি.

‘‘তত্ৰ খো, ভিক্খৱে, কো ৱিসেসো, কো অধিপ্পযাসো [অধিপ্পাযো (সী.), অধিপ্পাযসো (স্যা. কং. পী. ক.)], কিং নানাকৰণং, তথাগতস্স অৰহতো সম্মাসম্বুদ্ধস্স পঞ্ঞাৱিমুত্তেন ভিক্খুনা’’তি? ‘‘ভগৱংমূলকা নো, ভন্তে, ধম্মা ভগৱংনেত্তিকা ভগৱংপটিসৰণা. সাধু ৱত, ভন্তে, ভগৱন্তঞ্ঞেৱ পটিভাতু এতস্স ভাসিতস্স অত্থো. ভগৱতো সুত্ৱা ভিক্খূ ধাৰেস্সন্তী’’তি. ‘‘তেন হি, ভিক্খৱে, সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘তথাগতো, ভিক্খৱে, অৰহং সম্মাসম্বুদ্ধো অনুপ্পন্নস্স মগ্গস্স উপ্পাদেতা, অসঞ্জাতস্স মগ্গস্স সঞ্জনেতা [সঞ্জানেতা (স্যা. কং.)], অনক্খাতস্স মগ্গস্স অক্খাতা মগ্গঞ্ঞূ, মগ্গৱিদূ, মগ্গকোৱিদো; মগ্গানুগা চ, ভিক্খৱে, এতৰহি সাৱকা ৱিহৰন্তি পচ্ছাসমন্নাগতা. অযং খো, ভিক্খৱে, ৱিসেসো, অযং অধিপ্পযাসো, ইদং নানাকৰণং তথাগতস্স অৰহতো সম্মাসম্বুদ্ধস্স পঞ্ঞাৱিমুত্তেন ভিক্খুনা’’তি. ছট্ঠং.