৭. অনুধম্মসুত্তং

৩৯. সাৱত্থিনিদানং. ‘‘ধম্মানুধম্মপ্পটিপন্নস্স, ভিক্খৱে, ভিক্খুনো অযমনুধম্মো হোতি যং ৰূপে নিব্বিদাবহুলো [নিব্বিদাবহুলং (পী. ক.)] ৱিহৰেয্য, ৱেদনায নিব্বিদাবহুলো ৱিহৰেয্য, সঞ্ঞা নিব্বিদাবহুলো ৱিহৰেয্য, সঙ্খাৰেসু নিব্বিদাবহুলো ৱিহৰেয্য, ৱিঞ্ঞাণে নিব্বিদাবহুলো ৱিহৰেয্য. যো ৰূপে নিব্বিদাবহুলো ৱিহৰন্তো, ৱেদনায… সঞ্ঞায… সঙ্খাৰেসু নিব্বিদাবহুলো ৱিহৰন্তো, ৱিঞ্ঞাণে নিব্বিদাবহুলো ৱিহৰন্তো ৰূপং পৰিজানাতি, ৱেদনং… সঞ্ঞং… সঙ্খাৰে… ৱিঞ্ঞাণং পৰিজানাতি, সো ৰূপং পৰিজানং, ৱেদনং… সঞ্ঞং… সঙ্খাৰে… ৱিঞ্ঞাণং পৰিজানং পৰিমুচ্চতি ৰূপম্হা, পৰিমুচ্চতি ৱেদনা, পৰিমুচ্চতি সঞ্ঞায, পৰিমুচ্চতি সঙ্খাৰেহি, পৰিমুচ্চতি ৱিঞ্ঞাণম্হা, পৰিমুচ্চতি জাতিযা জৰামৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, পৰিমুচ্চতি দুক্খস্মাতি ৱদামী’’তি. সত্তমং.