১. নতুম্হাকংসুত্তং

৩৩. সাৱত্থিনিদানং. ‘‘যং, ভিক্খৱে, ন তুম্হাকং, তং পজহথ. তং ৱো পহীনং হিতায সুখায ভৱিস্সতি. কিঞ্চ, ভিক্খৱে, ন তুম্হাকং? ৰূপং, ভিক্খৱে, ন তুম্হাকং, তং পজহথ. তং ৱো পহীনং হিতায সুখায ভৱিস্সতি. ৱেদনা ন তুম্হাকং, তং পজহথ. সা ৱো পহীনা হিতায সুখায ভৱিস্সতি. সঞ্ঞা ন তুম্হাকং… সঙ্খাৰা ন তুম্হাকং, তে পজহথ. তে ৱো পহীনা হিতায সুখায ভৱিস্সন্তি. ৱিঞ্ঞাণং ন তুম্হাকং, তং পজহথ. তং ৱো পহীনং হিতায সুখায ভৱিস্সতি’’.

‘‘সেয্যথাপি, ভিক্খৱে, যং ইমস্মিং জেতৱনে তিণকট্ঠসাখাপলাসং তং জনো হৰেয্য ৱা ডহেয্য ৱা যথাপচ্চযং ৱা কৰেয্য. অপি নু তুম্হাকং এৱমস্স – ‘অম্হে জনো হৰতি ৱা ডহতি ৱা যথাপচ্চযং ৱা কৰোতী’’’তি? ‘‘নো হেতং, ভন্তে’’. ‘‘তং কিস্স হেতু’’? ‘‘ন হি নো এতং, ভন্তে, অত্তা ৱা অত্তনিযং ৱা’’তি. ‘‘এৱমেৱ খো, ভিক্খৱে, ৰূপং ন তুম্হাকং, তং পজহথ. তং ৱো পহীনং হিতায সুখায ভৱিস্সতি. ৱেদনা ন তুম্হাকং, তং পজহথ. সা ৱো পহীনা হিতায সুখায ভৱিস্সতি. সঞ্ঞা ন তুম্হাকং… সঙ্খাৰা ন তুম্হাকং… ৱিঞ্ঞাণং ন তুম্হাকং, তং পজহথ. তং ৱো পহীনং হিতায সুখায ভৱিস্সতী’’তি. পঠমং.