৪. দুতিযধম্মকথিকসুত্তং

১১৬. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘‘ধম্মকথিকো ধম্মকথিকো’তি, ভন্তে, ৱুচ্চতি. কিত্তাৱতা নু খো, ভন্তে, ধম্মকথিকো হোতি, কিত্তাৱতা ধম্মানুধম্মপ্পটিপন্নো হোতি, কিত্তাৱতা দিট্ঠধম্মনিব্বানপ্পত্তো হোতী’’তি? ‘‘ৰূপস্স চে, ভিক্খু, নিব্বিদায ৱিৰাগায নিৰোধায ধম্মং দেসেতি, ‘ধম্মকথিকো ভিক্খূ’তি অলং ৱচনায. ৰূপস্স চে, ভিক্খু, নিব্বিদায ৱিৰাগায নিৰোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলং ৱচনায. ৰূপস্স চে, ভিক্খু, নিব্বিদা ৱিৰাগা নিৰোধা অনুপাদাৱিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলং ৱচনায. ৱেদনায চে, ভিক্খু…পে… সঞ্ঞায চে, ভিক্খু… সঙ্খাৰানং চে, ভিক্খু… ৱিঞ্ঞাণস্স চে, ভিক্খু, নিব্বিদায ৱিৰাগায নিৰোধায ধম্মং দেসেতি, ‘ধম্মকথিকো ভিক্খূ’তি অলং ৱচনায. ৱিঞ্ঞাণস্স চে, ভিক্খু, নিব্বিদায ৱিৰাগায নিৰোধায পটিপন্নো হোতি, ‘ধম্মানুধম্মপ্পটিপন্নো ভিক্খূ’তি অলং ৱচনায. ৱিঞ্ঞাণস্স চে, ভিক্খু, নিব্বিদা ৱিৰাগা নিৰোধা অনুপাদাৱিমুত্তো হোতি, ‘দিট্ঠধম্মনিব্বানপ্পত্তো ভিক্খূ’তি অলং ৱচনাযা’’তি. চতুত্থং.