১০. সীলৱন্তসুত্তং

১২২. একং সমযং আযস্মা চ সাৰিপুত্তো আযস্মা চ মহাকোট্ঠিকো [মহাকোট্ঠিতো (সী. স্যা. কং. পী.)] বাৰাণসিযং ৱিহৰন্তি ইসিপতনে মিগদাযে. অথ খো আযস্মা মহাকোট্ঠিকো সাযন্হসমযং পটিসল্লানা ৱুট্ঠিতো যেনাযস্মা সাৰিপুত্তো তেনুপসঙ্কমি…পে… এতদৱোচ – ‘‘সীলৱতাৱুসো, সাৰিপুত্ত, ভিক্খুনা কতমে ধম্মা যোনিসো মনসিকাতব্বা’’তি? ‘‘সীলৱতাৱুসো, কোট্ঠিক, ভিক্খুনা পঞ্চুপাদানক্খন্ধা অনিচ্চতো দুক্খতো ৰোগতো গণ্ডতো সল্লতো অঘতো আবাধতো পৰতো পলোকতো সুঞ্ঞতো অনত্ততো যোনিসো মনসি কাতব্বা. কতমে পঞ্চ? সেয্যথিদং – ৰূপুপাদানক্খন্ধো, ৱেদনুপাদানক্খন্ধো, সঞ্ঞুপাদানক্খন্ধো, সঙ্খাৰুপাদানক্খন্ধো, ৱিঞ্ঞাণুপাদানক্খন্ধো. সীলৱতাৱুসো, কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো দুক্খতো ৰোগতো গণ্ডতো সল্লতো অঘতো আবাধতো পৰতো পলোকতো সুঞ্ঞতো অনত্ততো যোনিসো মনসি কাতব্বা. ঠানং খো পনেতং, আৱুসো, ৱিজ্জতি যং সীলৱা ভিক্খু ইমে পঞ্চুপাদানক্খন্ধে অনিচ্চতো…পে… অনত্ততো যোনিসো মনসি কৰোন্তো সোতাপত্তিফলং সচ্ছিকৰেয্যা’’তি.

‘‘সোতাপন্নেন পনাৱুসো সাৰিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘সোতাপন্নেনপি খো, আৱুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে… অনত্ততো যোনিসো মনসি কাতব্বা. ঠানং খো পনেতং, আৱুসো, ৱিজ্জতি যং সোতাপন্নো ভিক্খু ইমে পঞ্চুপাদানক্খন্ধে অনিচ্চতো…পে… অনত্ততো যোনিসো মনসি কৰোন্তো সকদাগামিফলং সচ্ছিকৰেয্যা’’তি.

‘‘সকদাগামিনা পনাৱুসো সাৰিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘সকদাগামিনাপি খো, আৱুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে… অনত্ততো যোনিসো মনসি কাতব্বা. ঠানং খো পনেতং, আৱুসো, ৱিজ্জতি যং সকদাগামী ভিক্খু ইমে পঞ্চুপাদানক্খন্ধে অনিচ্চতো…পে… অনত্ততো যোনিসো মনসি কৰোন্তো অনাগামিফলং সচ্ছিকৰেয্যা’’তি.

‘‘অনাগামিনা পনাৱুসো সাৰিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘অনাগামিনাপি খো, আৱুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে… অনত্ততো যোনিসো মনসি কাতব্বা. ঠানং খো পনেতং, আৱুসো, ৱিজ্জতি যং অনাগামী ভিক্খু ইমে পঞ্চুপাদানক্খন্ধে অনিচ্চতো…পে… অনত্ততো যোনিসো মনসি কৰোন্তো অৰহত্তং সচ্ছিকৰেয্যা’’তি.

‘‘অৰহতা পনাৱুসো সাৰিপুত্ত, কতমে ধম্মা যোনিসো মনসি কাতব্বা’’তি? ‘‘অৰহতাপি খো, আৱুসো কোট্ঠিক, ইমে পঞ্চুপাদানক্খন্ধে অনিচ্চতো দুক্খতো ৰোগতো গণ্ডতো সল্লতো অঘতো আবাধতো পৰতো পলোকতো সুঞ্ঞতো অনত্ততো যোনিসো মনসি কাতব্বা. নত্থি, খ্ৱাৱুসো, অৰহতো উত্তৰি কৰণীযং কতস্স ৱা পতিচযো; অপি চ ইমে ধম্মা ভাৱিতা বহুলীকতা দিট্ঠধম্মসুখৱিহাৰা চেৱ সংৱত্তন্তি সতিসম্পজঞ্ঞা চা’’তি. দসমং.