৯. কালত্তযঅনিচ্চসুত্তং

৯. সাৱত্থিনিদানং. ‘‘ৰূপং, ভিক্খৱে, অনিচ্চং অতীতানাগতং; কো পন ৱাদো পচ্চুপ্পন্নস্স! এৱং পস্সং, ভিক্খৱে, সুতৱা অৰিযসাৱকো অতীতস্মিং ৰূপস্মিং অনপেক্খো হোতি; অনাগতং ৰূপং নাভিনন্দতি; পচ্চুপ্পন্নস্স ৰূপস্স নিব্বিদায ৱিৰাগায নিৰোধায পটিপন্নো হোতি. ৱেদনা অনিচ্চা…পে… সঞ্ঞা অনিচ্চা… সঙ্খাৰা অনিচ্চা অতীতানাগতা; কো পন ৱাদো পচ্চুপ্পন্নানং! এৱং পস্সং, ভিক্খৱে, সুতৱা অৰিযসাৱকো অতীতেসু সঙ্খাৰেসু অনপেক্খো হোতি; অনাগতে সঙ্খাৰে নাভিনন্দতি; পচ্চুপ্পন্নানং সঙ্খাৰানং নিব্বিদায ৱিৰাগায নিৰোধায পটিপন্নো হোতি. ৱিঞ্ঞাণং অনিচ্চং অতীতানাগতং; কো পন ৱাদো পচ্চুপ্পন্নস্স! এৱং পস্সং, ভিক্খৱে, সুতৱা অৰিযসাৱকো অতীতস্মিং ৱিঞ্ঞাণস্মিং অনপেক্খো হোতি; অনাগতং ৱিঞ্ঞাণং নাভিনন্দতি; পচ্চুপ্পন্নস্স ৱিঞ্ঞাণস্স নিব্বিদায ৱিৰাগায নিৰোধায পটিপন্নো হোতী’’তি. নৱমং.