৩. কুলসুত্তং

২২৫. সাৱত্থিযং ৱিহৰতি…পে… ‘‘সেয্যথাপি, ভিক্খৱে, যানি কানিচি কুলানি বহুত্থিকানি অপ্পপুৰিসানি তানি সুপ্পধংসিযানি হোন্তি চোৰেহি কুম্ভত্থেনকেহি; এৱমেৱ খো, ভিক্খৱে, যস্স কস্সচি ভিক্খুনো মেত্তাচেতোৱিমুত্তি অভাৱিতা অবহুলীকতা সো সুপ্পধংসিযো হোতি অমনুস্সেহি. সেয্যথাপি, ভিক্খৱে, যানি কানিচি কুলানি অপ্পিত্থিকানি বহুপুৰিসানি তানি দুপ্পধংসিযানি হোন্তি চোৰেহি কুম্ভত্থেনকেহি, এৱমেৱ খো, ভিক্খৱে, যস্স কস্সচি ভিক্খুনো মেত্তাচেতোৱিমুত্তি ভাৱিতা বহুলীকতা সো দুপ্পধংসিযো হোতি অমনুস্সেহি. তস্মাতিহ, ভিক্খৱে, এৱং সিক্খিতব্বং – ‘মেত্তা নো চেতোৱিমুত্তি ভাৱিতা ভৱিস্সতি বহুলীকতা যানীকতা ৱত্থুকতা অনুট্ঠিতা পৰিচিতা সুসমাৰদ্ধা’তি. এৱঞ্হি ৱো, ভিক্খৱে, সিক্খিতব্ব’’ন্তি. ততিযং.