১. তিণকট্ঠসুত্তং

১২৪. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘অনমতগ্গোযং [অনমতগ্গাযং (পী. ক.)] ভিক্খৱে, সংসাৰো. পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. সেয্যথাপি, ভিক্খৱে, পুৰিসো যং ইমস্মিং জম্বুদীপে তিণকট্ঠসাখাপলাসং তং ছেত্ৱা [তচ্ছেত্ৱা (বহূসু)] একজ্ঝং সংহৰিত্ৱা চতুৰঙ্গুলং চতুৰঙ্গুলং ঘটিকং কত্ৱা নিক্খিপেয্য – ‘অযং মে মাতা, তস্সা মে মাতু অযং মাতা’তি, অপৰিযাদিন্নাৱ [অপৰিযাদিণ্ণাৱ (সী.)] ভিক্খৱে, তস্স পুৰিসস্স মাতুমাতৰো অস্সু, অথ ইমস্মিং জম্বুদীপে তিণকট্ঠসাখাপলাসং পৰিক্খযং পৰিযাদানং গচ্ছেয্য. তং কিস্স হেতু? অনমতগ্গোযং, ভিক্খৱে, সংসাৰো. পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. এৱং দীঘৰত্তং ৱো, ভিক্খৱে, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী [কটসি (সী. পী. ক.) কটা ছৱা সযন্তি এত্থাতি কটসী] ৱড্ঢিতা. যাৱঞ্চিদং, ভিক্খৱে, অলমেৱ সব্বসঙ্খাৰেসু নিব্বিন্দিতুং অলং ৱিৰজ্জিতুং অলং ৱিমুচ্চিতু’’ন্তি. পঠমং.