৪. সত্তকম্মপথসুত্তং

১১০. সাৱত্থিযং ৱিহৰতি…পে… ‘‘ধাতুসোৱ, ভিক্খৱে, সত্তা সংসন্দন্তি সমেন্তি. পাণাতিপাতিনো পাণাতিপাতীহি সদ্ধিং সংসন্দন্তি সমেন্তি; অদিন্নাদাযিনো অদিন্নাদাযীহি সদ্ধিং সংসন্দন্তি সমেন্তি; কামেসুমিচ্ছাচাৰিনো কামেসুমিচ্ছাচাৰীহি সদ্ধিং সংসন্দন্তি সমেন্তি; মুসাৱাদিনো মুসাৱাদীহি সদ্ধিং সংসন্দন্তি সমেন্তি; পিসুণৱাচা পিসুণৱাচেহি সদ্ধিং সংসন্দন্তি সমেন্তি; ফৰুসৱাচা ফৰুসৱাচেহি সদ্ধিং সংসন্দন্তি সমেন্তি; সম্ফপ্পলাপিনো সম্ফপ্পলাপীহি সদ্ধিং সংসন্দন্তি সমেন্তি’’.

‘‘পাণাতিপাতা পটিৱিৰতা…পে… অদিন্নাদানা পটিৱিৰতা… কামেসুমিচ্ছাচাৰা পটিৱিৰতা… মুসাৱাদা পটিৱিৰতা… পিসুণায ৱাচায পটিৱিৰতা পিসুণায ৱাচায পটিৱিৰতেহি সদ্ধিং সংসন্দন্তি সমেন্তি; ফৰুসায ৱাচায পটিৱিৰতা ফৰুসায ৱাচায পটিৱিৰতেহি সদ্ধিং সংসন্দন্তি সমেন্তি; সম্ফপ্পলাপা পটিৱিৰতা সম্ফপ্পলাপা পটিৱিৰতেহি সদ্ধিং সংসন্দন্তি সমেন্তী’’তি. চতুত্থং.