৩. পঞ্চসিক্খাপদসুত্তং

১০৯. সাৱত্থিযং ৱিহৰতি…পে… ‘‘ধাতুসোৱ, ভিক্খৱে, সত্তা সংসন্দন্তি সমেন্তি. পাণাতিপাতিনো পাণাতিপাতীহি সদ্ধিং সংসন্দন্তি সমেন্তি; অদিন্নাদাযিনো অদিন্নাদাযীহি সদ্ধিং সংসন্দন্তি সমেন্তি; কামেসুমিচ্ছাচাৰিনো কামেসুমিচ্ছাচাৰীহি সদ্ধিং সংসন্দন্তি সমেন্তি; মুসাৱাদিনো মুসাৱাদীহি সদ্ধিং সংসন্দন্তি সমেন্তি; সুৰামেৰযমজ্জপ্পমাদট্ঠাযিনো সুৰামেৰযমজ্জপ্পমাদট্ঠাযীহি সদ্ধিং সংসন্দন্তি সমেন্তি’’.

‘‘পাণাতিপাতা পটিৱিৰতা পাণাতিপাতা পটিৱিৰতেহি সদ্ধিং সংসন্দন্তি সমেন্তি; অদিন্নাদানা পটিৱিৰতা অদিন্নাদানা পটিৱিৰতেহি সদ্ধিং সংসন্দন্তি সমেন্তি; কামেসুমিচ্ছাচাৰা পটিৱিৰতা কামেসুমিচ্ছাচাৰা পটিৱিৰতেহি সদ্ধিং সংসন্দন্তি সমেন্তি; মুসাৱাদা পটিৱিৰতা মুসাৱাদা পটিৱিৰতেহি সদ্ধিং সংসন্দন্তি সমেন্তি; সুৰামেৰযমজ্জপ্পমাদট্ঠানা পটিৱিৰতা সুৰামেৰযমজ্জপ্পমাদট্ঠানা পটিৱিৰতেহি সদ্ধিং সংসন্দন্তি সমেন্তী’’তি. ততিযং.