৮. নন্দসুত্তং

২৪২. সাৱত্থিযং ৱিহৰতি. অথ খো আযস্মা নন্দো ভগৱতো মাতুচ্ছাপুত্তো আকোটিতপচ্চাকোটিতানি চীৱৰানি পাৰুপিত্ৱা অক্খীনি অঞ্জেত্ৱা অচ্ছং পত্তং গহেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো আযস্মন্তং নন্দং ভগৱা এতদৱোচ – ‘‘ন খো তে তং, নন্দ, পতিৰূপং কুলপুত্তস্স সদ্ধা অগাৰস্মা অনগাৰিযং পব্বজিতস্স, যং ত্ৱং আকোটিতপচ্চাকোটিতানি চীৱৰানি পাৰুপেয্যাসি, অক্খীনি চ অঞ্জেয্যাসি, অচ্ছঞ্চ পত্তং ধাৰেয্যাসি. এতং খো তে, নন্দ, পতিৰূপং কুলপুত্তস্স সদ্ধা অগাৰস্মা অনগাৰিযং পব্বজিতস্স, যং ত্ৱং আৰঞ্ঞিকো চ অস্সসি, পিণ্ডপাতিকো চ পংসুকুলিকো চ কামেসু চ অনপেক্খো ৱিহৰেয্যাসী’’তি. ইদমৱোচ ভগৱা…পে… সত্থা –

‘‘কদাহং নন্দং পস্সেয্যং, আৰঞ্ঞং পংসুকূলিকং;

অঞ্ঞাতুঞ্ছেন যাপেন্তং, কামেসু অনপেক্খিন’’ন্তি.

অথ খো আযস্মা নন্দো অপৰেন সমযেন আৰঞ্ঞিকো চ পিণ্ডপাতিকো চ পংসুকূলিকো চ কামেসু চ অনপেক্খো ৱিহাসীতি. অট্ঠমং.