৪. নৱসুত্তং

২৩৮. সাৱত্থিযং ৱিহৰতি. তেন খো পন সমযেন অঞ্ঞতৰো নৱো ভিক্খু পচ্ছাভত্তং পিণ্ডপাতপটিক্কন্তো ৱিহাৰং পৱিসিত্ৱা অপ্পোস্সুক্কো তুণ্হীভূতো সঙ্কসাযতি, ন ভিক্খূনং ৱেয্যাৱচ্চং কৰোতি চীৱৰকাৰসমযে. অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ, ভন্তে, অঞ্ঞতৰো নৱো ভিক্খু পচ্ছাভত্তং পিণ্ডপাতপটিক্কন্তো ৱিহাৰং পৱিসিত্ৱা অপ্পোস্সুক্কো তুণ্হীভূতো সঙ্কসাযতি, ন ভিক্খূনং ৱেয্যাৱচ্চং কৰোতি চীৱৰকাৰসমযে’’তি.

অথ খো ভগৱা অঞ্ঞতৰং ভিক্খুং আমন্তেসি – ‘‘এহি ত্ৱং, ভিক্খু, মম ৱচনেন তং ভিক্খুং আমন্তেহি ‘সত্থা তং, আৱুসো, আমন্তেতী’’’তি. ‘‘এৱং ভন্তে’’তি খো সো ভিক্খু ভগৱতো পটিস্সুত্ৱা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং এতদৱোচ – ‘‘সত্থা তং, আৱুসো, আমন্তেতী’’তি. ‘‘এৱমাৱুসো’’তি খো সো ভিক্খু তস্স ভিক্খুনো পটিস্সুত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো তং ভিক্খুং ভগৱা এতদৱোচ – ‘‘সচ্চং কিৰ ত্ৱং, ভিক্খু, পচ্ছাভত্তং পিণ্ডপাতপটিক্কন্তো ৱিহাৰং পৱিসিত্ৱা অপ্পোস্সুক্কো তুণ্হীভূতো সঙ্কসাযসি, ন ভিক্খূনং ৱেয্যাৱচ্চং কৰোসি চীৱৰকাৰসমযে’’তি? ‘‘অহম্পি খো, ভন্তে, সকং কিচ্চং কৰোমী’’তি.

অথ খো ভগৱা তস্স ভিক্খুনো চেতসা চেতোপৰিৱিতক্কমঞ্ঞায ভিক্খূ আমন্তেসি – ‘‘মা খো তুম্হে, ভিক্খৱে, এতস্স ভিক্খুনো উজ্ঝাযিত্থ. এসো খো, ভিক্খৱে, ভিক্খু চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী অকিচ্ছলাভী অকসিৰলাভী, যস্স চত্থায কুলপুত্তা সম্মদেৱ অগাৰস্মা অনগাৰিযং পব্বজন্তি, তদনুত্তৰং ব্ৰহ্মচৰিযপৰিযোসানং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতী’’তি.

ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘নযিদং সিথিলমাৰব্ভ, নযিদং অপ্পেন থামসা;

নিব্বানং অধিগন্তব্বং, সব্বদুক্খপ্পমোচনং.

‘‘অযঞ্চ দহৰো ভিক্খু, অযমুত্তমপুৰিসো;

ধাৰেতি অন্তিমং দেহং, জেত্ৱা মাৰং সৱাহিনি’’ন্তি. চতুত্থং;