১. কোলিতসুত্তং

২৩৫. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো আযস্মা মহামোগ্গল্লানো ভিক্খূ আমন্তেসি – ‘‘আৱুসো ভিক্খৱে’’তি. ‘‘আৱুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং.

আযস্মা মহামোগ্গল্লানো এতদৱোচ – ‘‘ইধ ময্হং, আৱুসো, ৰহোগতস্স পটিসল্লীনস্স এৱং চেতসো পৰিৱিতক্কো উদপাদি – ‘অৰিযো তুণ্হীভাৱো, অৰিযো তুণ্হীভাৱোতি ৱুচ্চতি. কতমো নু খো অৰিযো তুণ্হীভাৱো’তি? তস্স ময্হং আৱুসো, এতদহোসি – ‘ইধ ভিক্খু ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰতি. অযং ৱুচ্চতি অৰিযো তুণ্হীভাৱো’তি. সো খ্ৱাহং, আৱুসো, ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰিং. তস্স ময্হং, আৱুসো, ইমিনা ৱিহাৰেন ৱিহৰতো ৱিতক্কসহগতা সঞ্ঞা মনসিকাৰা সমুদাচৰন্তি’’.

‘‘অথ খো মং, আৱুসো, ভগৱা ইদ্ধিযা উপসঙ্কমিত্ৱা এতদৱোচ – ‘মোগ্গল্লান, মোগ্গল্লান, মা, ব্ৰাহ্মণ, অৰিযং তুণ্হীভাৱং পমাদো, অৰিযে তুণ্হীভাৱে চিত্তং সণ্ঠপেহি, অৰিযে তুণ্হীভাৱে চিত্তং একোদিভাৱং কৰোহি, অৰিযে তুণ্হীভাৱে চিত্তং সমাদহা’তি. সো খ্ৱাহং, আৱুসো, অপৰেন সমযেন ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰামি. যঞ্হি তং, আৱুসো, সম্মা ৱদমানো ৱদেয্য – ‘সত্থাৰা অনুগ্গহিতো সাৱকো মহাভিঞ্ঞতং পত্তো’তি, মমং তং সম্মা ৱদমানো ৱদেয্য – ‘সত্থাৰা অনুগ্গহিতো সাৱকো মহাভিঞ্ঞতং পত্তো’’’তি. পঠমং.