৭. কণ্ডকৱিমানৱত্থু

১১৭১. ‘‘পুণ্ণমাসে যথা চন্দো, নক্খত্তপৰিৱাৰিতো;

সমন্তা অনুপৰিযাতি, তাৰকাধিপতী সসী.

১১৭২. ‘‘তথূপমং ইদং ব্যম্হং, দিব্বং দেৱপুৰম্হি চ;

অতিৰোচতি ৱণ্ণেন, উদযন্তোৱ ৰংসিমা.

১১৭৩. ‘‘ৱেড়ুৰিযসুৱণ্ণস্স, ফলিকা ৰূপিযস্স চ;

মসাৰগল্লমুত্তাহি, লোহিতঙ্গমণীহি চ.

১১৭৪. ‘‘চিত্ৰা মনোৰমা ভূমি, ৱেড়ূৰিযস্স সন্থতা;

কূটাগাৰা সুভা ৰম্মা, পাসাদো তে সুমাপিতো.

১১৭৫. ‘‘ৰম্মা চ তে পোক্খৰণী, পুথুলোমনিসেৱিতা;

অচ্ছোদকা ৱিপ্পসন্না, সোৱণ্ণৱালুকসন্থতা.

১১৭৬. ‘‘নানাপদুমসঞ্ছন্না, পুণ্ডৰীকসমোততা [সমোত্থতা (ক.), সমোগতা (স্যা.)];

সুৰভিং সম্পৱাযন্তি, মনুঞ্ঞা মালুতেৰিতা.

১১৭৭. ‘‘তস্সা তে উভতো পস্সে, ৱনগুম্বা সুমাপিতা;

উপেতা পুপ্ফৰুক্খেহি, ফলৰুক্খেহি চূভযং.

১১৭৮. ‘‘সোৱণ্ণপাদে পল্লঙ্কে, মুদুকে গোণকত্থতে [চোলসন্থতে (সী.)];

নিসিন্নং দেৱৰাজংৱ, উপতিট্ঠন্তি অচ্ছৰা.

১১৭৯. ‘‘সব্বাভৰণসঞ্ছন্না, নানামালাৱিভূসিতা;

ৰমেন্তি তং মহিদ্ধিকং, ৱসৱত্তীৱ মোদসি.

১১৮০. ‘‘ভেৰিসঙ্খমুদিঙ্গাহি, ৱীণাহি পণৱেহি চ;

ৰমসি ৰতিসম্পন্নো, নচ্চগীতে সুৱাদিতে.

১১৮১. ‘‘দিব্বা তে ৱিৱিধা ৰূপা, দিব্বা সদ্দা অথো ৰসা;

গন্ধা চ তে অধিপ্পেতা, ফোট্ঠব্বা চ মনোৰমা.

১১৮২. ‘‘তস্মিং ৱিমানে পৱৰে, দেৱপুত্ত মহপ্পভো;

অতিৰোচসি ৱণ্ণেন, উদযন্তোৱ ভাণুমা.

১১৮৩. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৮৪. সো দেৱপুত্তো অত্তমনো…পে… যস্স কম্মস্সিদং ফলং.

১১৮৫. ‘‘অহং কপিলৱত্থুস্মিং, সাকিযানং পুৰুত্তমে;

সুদ্ধোদনস্স পুত্তস্স, কণ্ডকো সহজো অহং.

১১৮৬. ‘‘যদা সো অড্ঢৰত্তাযং, বোধায মভিনিক্খমি;

সো মং মুদূহি পাণীহি, জালি [জাল (সী.)] তম্বনখেহি চ.

১১৮৭. ‘‘সত্থিং আকোটযিত্ৱান, ৱহ সম্মাতি চব্ৰৱি;

অহং লোকং তাৰযিস্সং, পত্তো সম্বোধিমুত্তমং.

১১৮৮. ‘‘তং মে গিৰং সুণন্তস্স, হাসো মে ৱিপুলো অহু;

উদগ্গচিত্তো সুমনো, অভিসীসিং [অভিসিংসিং (সী.), অভিসীসি (পী.)] তদা অহং.

১১৮৯. ‘‘অভিৰূড়্হঞ্চ মং ঞত্ৱা, সক্যপুত্তং মহাযসং;

উদগ্গচিত্তো মুদিতো, ৱহিস্সং পুৰিসুত্তমং.

১১৯০. ‘‘পৰেসং ৱিজিতং গন্ত্ৱা, উগ্গতস্মিং দিৱাকৰে [দিৱঙ্কৰে (স্যা. ক.)];

মমং ছন্নঞ্চ ওহায, অনপেক্খো সো অপক্কমি.

১১৯১. ‘‘তস্স তম্বনখে পাদে, জিৱ্হায পৰিলেহিসং;

গচ্ছন্তঞ্চ মহাৱীৰং, ৰুদমানো উদিক্খিসং.

১১৯২. ‘‘অদস্সনেনহং তস্স, সক্যপুত্তস্স সিৰীমতো;

অলত্থং গৰুকাবাধং, খিপ্পং মে মৰণং অহু.

১১৯৩. ‘‘তস্সেৱ আনুভাৱেন, ৱিমানং আৱসামিদং;

সব্বকামগুণোপেতং, দিব্বং দেৱপুৰম্হি চ.

১১৯৪. ‘‘যঞ্চ মে অহুৱা হাসো, সদ্দং সুত্ৱান বোধিযা;

তেনেৱ কুসলমূলেন, ফুসিস্সং আসৱক্খযং.

১১৯৫. ‘‘সচে হি ভন্তে গচ্ছেয্যাসি, সত্থু বুদ্ধস্স সন্তিকে;

মমাপি নং ৱচনেন, সিৰসা ৱজ্জাসি ৱন্দনং.

১১৯৬. ‘‘অহম্পি দট্ঠুং গচ্ছিস্সং, জিনং অপ্পটিপুগ্গলং;

দুল্লভং দস্সনং হোতি, লোকনাথান তাদিন’’ন্তি.

১১৯৭. সো কতঞ্ঞূ কতৱেদী, সত্থাৰং উপসঙ্কমি;

সুত্ৱা গিৰং চক্খুমতো, ধম্মচক্খুং ৱিসোধযি.

১১৯৮. ৱিসোধেত্ৱা দিট্ঠিগতং, ৱিচিকিচ্ছং ৱতানি চ;

ৱন্দিত্ৱা সত্থুনো পাদে, তত্থেৱন্তৰধাযথাতি [তত্থেৱন্তৰধাযতীতি (ক.)].

কণ্ডকৱিমানং সত্তমং.