৪. সুৱণ্ণৱিমানৱত্থু

১১৩৪. ‘‘সোৱণ্ণমযে পব্বতস্মিং, ৱিমানং সব্বতোপভং;

হেমজালপটিচ্ছন্নং [হেমজালকপচ্ছন্নং (সী.)], কিঙ্কিণি [কিঙ্কণিক (স্যা. ক.), কিঙ্কিণিক (পী.)] জালকপ্পিতং.

১১৩৫. ‘‘অট্ঠংসা সুকতা থম্ভা, সব্বে ৱেড়ুৰিযামযা;

একমেকায অংসিযা, ৰতনা সত্ত নিম্মিতা.

১১৩৬. ‘‘ৱেড়ুৰিযসুৱণ্ণস্স, ফলিকা ৰূপিযস্স চ;

মসাৰগল্লমুত্তাহি, লোহিতঙ্গমণীহি চ.

১১৩৭. ‘‘চিত্ৰা মনোৰমা ভূমি, ন তত্থুদ্ধংসতী ৰজো;

গোপাণসীগণা পীতা, কূটং ধাৰেন্তি নিম্মিতা.

১১৩৮. ‘‘সোপাণানি চ চত্তাৰি, নিম্মিতা চতুৰো দিসা;

নানাৰতনগব্ভেহি, আদিচ্চোৱ ৱিৰোচতি.

১১৩৯. ‘‘ৱেদিযা চতস্সো তত্থ, ৱিভত্তা ভাগসো মিতা;

দদ্দল্লমানা আভন্তি, সমন্তা চতুৰো দিসা.

১১৪০. ‘‘তস্মিং ৱিমানে পৱৰে, দেৱপুত্তো মহপ্পভো;

অতিৰোচসি ৱণ্ণেন, উদযন্তোৱ ভাণুমা.

১১৪১. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৪২. সো দেৱপুত্তো অত্তমনো…পে… যস্স কম্মস্সিদং ফলং.

১১৪৩. ‘‘অহং অন্ধকৱিন্দস্মিং, বুদ্ধস্সাদিচ্চবন্ধুনো;

ৱিহাৰং সত্থু কাৰেসিং, পসন্নো সেহি পাণিভি.

১১৪৪. ‘‘তত্থ গন্ধঞ্চ মালঞ্চ, পচ্চযঞ্চ [পচ্চগ্গঞ্চ (সী.), পচ্চগ্ঘঞ্চ (?)] ৱিলেপনং;

ৱিহাৰং সত্থু অদাসিং, ৱিপ্পসন্নেন চেতসা;

তেন ময্হং ইদং লদ্ধং, ৱসং ৱত্তেমি নন্দনে.

১১৪৫. ‘‘নন্দনে চ ৱনে [নন্দনে পৱনে (সী. স্যা.)] ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি.

সুৱণ্ণৱিমানং চতুত্থং.