৫. কঞ্জিকদাযিকাৱিমানৱত্থু

৭১৯. ‘‘অভিক্কন্তেন ৱণ্ণেন…পে… ওসধী ৱিয তাৰকা.

৭২০. ‘‘কেন তেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

৭২২. সা দেৱতা অত্তমনা…পে… যস্স কম্মস্সিদং ফলং.

৭২৩. ‘‘অহং অন্ধকৱিন্দম্হি, বুদ্ধস্সাদিচ্চবন্ধুনো;

অদাসিং কোলসম্পাকং, কঞ্জিকং তেলধূপিতং.

৭২৪. ‘‘পিপ্ফল্যা লসুণেন চ, মিস্সং লামঞ্জকেন চ;

অদাসিং উজুভূতস্মিং [উজুভূতেসু (ক.)], ৱিপ্পসন্নেন চেতসা.

৭২৫. ‘‘যা মহেসিত্তং কাৰেয্য, চক্কৱত্তিস্স ৰাজিনো;

নাৰী সব্বঙ্গকল্যাণী, ভত্তু চানোমদস্সিকা;

একস্স কঞ্জিকদানস্স, কলং নাগ্ঘতি সোড়সিং.

৭২৬. ‘‘সতং নিক্খা সতং অস্সা, সতং অস্সতৰীৰথা;

সতং কঞ্ঞাসহস্সানি, আমুত্তমণিকুণ্ডলা;

একস্স কঞ্জিকদানস্স, কলং নাগ্ঘন্তি সোড়সিং.

৭২৭. ‘‘সতং হেমৱতা নাগা, ঈসাদন্তা উৰূড়্হৱা;

সুৱণ্ণকচ্ছা মাতঙ্গা, হেমকপ্পনৱাসসা;

একস্স কঞ্জিকদানস্স, কলং নাগ্ঘন্তি সোড়সিং.

৭২৮. ‘‘চতুন্নমপি দীপানং, ইস্সৰং যোধ কাৰযে;

একস্স কঞ্জিকদানস্স, কলং নাগ্ঘতি সোড়সি’’ন্তি.

কঞ্জিকদাযিকাৱিমানং পঞ্চমং.