৬. ৱিহাৰৱিমানৱত্থু

৭২৯. ‘‘অভিক্কন্তেন ৱণ্ণেন…পে… ওসধী ৱিয তাৰকা.

৭৩০. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছৰন্তি, সৱনীযা মনোৰমা.

৭৩১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৱাযন্তি, সুচিগন্ধা মনোৰমা.

৭৩২. ‘‘ৱিৱত্তমানা কাযেন, যা ৱেণীসু পিড়ন্ধনা;

তেসং সুয্যতি নিগ্ঘোসো, তুৰিযে পঞ্চঙ্গিকে যথা.

৭৩৩. ‘‘ৱটংসকা ৱাতধুতা, ৱাতেন সম্পকম্পিতা;

তেসং সুয্যতি নিগ্ঘোসো, তুৰিযে পঞ্চঙ্গিকে যথা.

৭৩৪. ‘‘যাপি তে সিৰস্মিং মালা, সুচিগন্ধা মনোৰমা;

ৱাতি গন্ধো দিসা সব্বা, ৰুক্খো মঞ্জূসকো যথা.

৭৩৫. ‘‘ঘাযসে তং সুচিগন্ধং, ৰূপং পস্সসি অমানুসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৭৩৬. ‘‘সাৱত্থিযং ময্হং সখী ভদন্তে, সঙ্ঘস্স কাৰেসি মহাৱিহাৰং;

তত্থপ্পসন্না অহমানুমোদিং, দিস্ৱা অগাৰঞ্চ পিযঞ্চ মেতং.

৭৩৭. ‘‘তাযেৱ মে সুদ্ধনুমোদনায, লদ্ধং ৱিমানব্ভুতদস্সনেয্যং;

সমন্ততো সোড়সযোজনানি, ৱেহাযসং গচ্ছতি ইদ্ধিযা মম.

৭৩৮. ‘‘কূটাগাৰা নিৱেসা মে, ৱিভত্তা ভাগসো মিতা;

দদ্দল্লমানা আভন্তি, সমন্তা সতযোজনং.

৭৩৯. ‘‘পোক্খৰঞ্ঞো চ মে এত্থ, পুথুলোমনিসেৱিতা;

অচ্ছোদকা [অচ্ছোদিকা (সী.)] ৱিপ্পসন্না, সোণ্ণৱালুকসন্থতা.

৭৪০. ‘‘নানাপদুমসঞ্ছন্না, পুণ্ডৰীকসমোততা [পণ্ডৰীকসমোনতা (সী.)];

সুৰভী সম্পৱাযন্তি, মনুঞ্ঞা মালুতেৰিতা.

৭৪১. ‘‘জম্বুযো পনসা তালা, নাড়িকেৰৱনানি চ;

অন্তোনিৱেসনে জাতা, নানাৰুক্খা অৰোপিমা.

৭৪২. ‘‘নানাতূৰিযসঙ্ঘুট্ঠং, অচ্ছৰাগণঘোসিতং;

যোপি মং সুপিনে পস্সে, সোপি ৱিত্তো সিযা নৰো.

৭৪৩. ‘‘এতাদিসং অব্ভুতদস্সনেয্যং, ৱিমানং সব্বসোপভং;

মম কম্মেহি নিব্বত্তং, অলং পুঞ্ঞানি কাতৱে’’তি.

৭৪৪. ‘‘তাযেৱ তে সুদ্ধনুমোদনায, লদ্ধং ৱিমানব্ভুতদস্সনেয্যং;

যা চেৱ সা দানমদাসি নাৰী, তস্সা গতিং ব্ৰূহি কুহিং উপ্পন্না [উপপন্না (ক.)] সা’’তি.

৭৪৫. ‘‘যা সা অহু ময্হং সখী ভদন্তে, সঙ্ঘস্স কাৰেসি মহাৱিহাৰং;

ৱিঞ্ঞাতধম্মা সা অদাসি দানং, উপ্পন্না নিম্মানৰতীসু দেৱেসু.

৭৪৬. ‘‘পজাপতী তস্স সুনিম্মিতস্স, অচিন্তিযা কম্মৱিপাকা তস্স;

যমেতং পুচ্ছসি কুহিং উপ্পন্না [উপপন্না (ক.)] সাতি, তং তে ৱিযাকাসিং অনঞ্ঞথা অহং.

৭৪৭. ‘‘তেনহঞ্ঞেপি সমাদপেথ, সঙ্ঘস্স দানানি দদাথ ৱিত্তা;

ধম্মঞ্চ সুণাথ পসন্নমানসা, সুদুল্লভো লদ্ধো মনুস্সলাভো.

৭৪৮. ‘‘যং মগ্গং মগ্গাধিপতী অদেসযি [মগ্গাধিপত্যদেসযি (সী.)], ব্ৰহ্মস্সৰো কঞ্চনসন্নিভত্তচো;

সঙ্ঘস্স দানানি দদাথ ৱিত্তা, মহপ্ফলা যত্থ ভৱন্তি দক্খিণা.

৭৪৯. [খু. পা. ৬.৬; সু. নি. ২২৯] ‘‘যে পুগ্গলা অট্ঠ সতং পসত্থা, চত্তাৰি এতানি যুগানি হোন্তি;

তে দক্খিণেয্যা সুগতস্স সাৱকা, এতেসু দিন্নানি মহপ্ফলানি.

৭৫০. [ৱি. ৱ. ৬৪১] ‘‘চত্তাৰো চ পটিপন্না, চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

৭৫১. [ৱি. ৱ. ৬৪২] ‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, সঙ্ঘে দিন্নং মহপ্ফলং.

৭৫২. [ৱি. ৱ. ৬৪৩] ‘‘এসো হি সঙ্ঘো ৱিপুলো মহগ্গতো, এসপ্পমেয্যো উদধীৱ সাগৰো;

এতেহি সেট্ঠা নৰৱীৰসাৱকা, পভঙ্কৰা ধম্মমুদীৰযন্তি [নত্থেত্থ পাঠভেদো].

৭৫৩. [ৱি. ৱ. ৬৪৪] ‘‘তেসং সুদিন্নং সুহুতং সুযিট্ঠং, যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা, মহপ্ফলা লোকৱিদূন [লোকৱিদূহি (ক.)] ৱণ্ণিতা.

৭৫৪. ‘‘এতাদিসং যঞ্ঞমনুস্সৰন্তা, যে ৱেদজাতা ৱিচৰন্তি লোকে;

ৱিনেয্য মচ্ছেৰমলং সমূলং, অনিন্দিতা সগ্গমুপেন্তি ঠান’’ন্তি.

ৱিহাৰৱিমানং ছট্ঠং.

ভাণৱাৰং দুতিযং নিট্ঠিতং.