৪. লতাৱিমানৱত্থু

৩১৬. লতা চ সজ্জা পৱৰা চ দেৱতা, অচ্চিমতী [অচ্চিমুখী (সী.), অচ্ছিমতী (পী. ক.) অচ্ছিমুতী (স্যা.)] ৰাজৱৰস্স সিৰীমতো;

সুতা চ ৰঞ্ঞো ৱেস্সৱণস্স ধীতা, ৰাজীমতী ধম্মগুণেহি সোভথ.

৩১৭. পঞ্চেত্থ নাৰিযো আগমংসু ন্হাযিতুং, সীতোদকং উপ্পলিনিং সিৱং নদিং;

তা তত্থ ন্হাযিত্ৱা ৰমেত্ৱা দেৱতা, নচ্চিত্ৱা গাযিত্ৱা সুতা লতং ব্ৰৱি [ব্ৰুৱী (সী.)].

৩১৮. ‘‘পুচ্ছামি তং উপ্পলমালধাৰিনি, আৱেড়িনি কঞ্চনসন্নিভত্তচে;

তিমিৰতম্বক্খি নভেৱ সোভনে, দীঘাযুকী কেন কতো যসো তৱ.

৩১৯. ‘‘কেনাসি ভদ্দে পতিনো পিযতৰা, ৱিসিট্ঠকল্যাণিতৰস্সু ৰূপতো;

পদক্খিণা নচ্চগীতৱাদিতে, আচিক্খ নো ত্ৱং নৰনাৰিপুচ্ছিতা’’তি.

৩২০. ‘‘অহং মনুস্সেসু মনুস্সভূতা, উড়াৰভোগে কুলে সুণিসা অহোসিং;

অক্কোধনা ভত্তুৱসানুৱত্তিনী, উপোসথে অপ্পমত্তা অহোসিং.

৩২১. ‘‘মনুস্সভূতা দহৰা অপাপিকা [দহৰাস’পাপিকা (সী.)], পসন্নচিত্তা পতিমাভিৰাধযিং;

সদেৱৰং সস্সসুৰং সদাসকং, অভিৰাধযিং তম্হি কতো যসো মম.

৩২২. ‘‘সাহং তেন কুসলেন কম্মুনা, চতুব্ভি ঠানেহি ৱিসেসমজ্ঝগা;

আযুঞ্চ ৱণ্ণঞ্চ সুখং বলঞ্চ, খিড্ডাৰতিং পচ্চনুভোমনপ্পকং.

৩২৩. ‘‘সুতং নু তং ভাসতি যং অযং লতা, যং নো অপুচ্ছিম্হ অকিত্তযী নো;

পতিনো কিৰম্হাকং ৱিসিট্ঠ নাৰীনং, গতী চ তাসং পৱৰা চ দেৱতা.

৩২৪. ‘‘পতীসু ধম্মং পচৰাম সব্বা, পতিব্বতা যত্থ ভৱন্তি ইত্থিযো;

পতীসু ধম্মং পচৰিত্ৱ [পচৰিত্ৱান (ক.)] সব্বা, লচ্ছামসে ভাসতি যং অযং লতা.

৩২৫. ‘‘সীহো যথা পব্বতসানুগোচৰো, মহিন্ধৰং পব্বতমাৱসিত্ৱা;

পসয্হ হন্ত্ৱা ইতৰে চতুপ্পদে, খুদ্দে মিগে খাদতি মংসভোজনো.

৩২৬. ‘‘তথেৱ সদ্ধা ইধ অৰিযসাৱিকা, ভত্তাৰং নিস্সায পতিং অনুব্বতা;

কোধং ৱধিত্ৱা অভিভুয্য মচ্ছৰং, সগ্গম্হি সা মোদতি ধম্মচাৰিনী’’তি.

লতাৱিমানং চতুত্থং.