৭. উপোসথাৱিমানৱত্থু

২২৯. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

২৩০. ‘‘কেন তেতাদিসো ৱণ্ণো…পে…

ৱণ্ণো চ তে সব্বদিসা পভাসতী’’তি.

২৩২. সা দেৱতা অত্তমনা…পে… যস্স কম্মস্সিদং ফলং.

২৩৩. ‘‘উপোসথাতি মং অঞ্ঞংসু, সাকেতাযং উপাসিকা;

সদ্ধা সীলেন সম্পন্না, সংৱিভাগৰতা সদা.

২৩৪. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৱিপ্পসন্নেন চেতসা.

২৩৫. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

২৩৬. ‘‘উপোসথং উপৱসিস্সং, সদা সীলেসু সংৱুতা;

সঞ্ঞমা সংৱিভাগা চ, ৱিমানং আৱসামহং.

২৩৭. ‘‘পাণাতিপাতা ৱিৰতা, মুসাৱাদা চ সঞ্ঞতা;

থেয্যা চ অতিচাৰা চ, মজ্জপানা চ আৰকা.

২৩৮. ‘‘পঞ্চসিক্খাপদে ৰতা, অৰিযসচ্চান কোৱিদা;

উপাসিকা চক্খুমতো, গোতমস্স যসস্সিনো.

২৩৯. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

২৪১. ‘‘অভিক্খণং নন্দনং সুত্ৱা, ছন্দো মে উদপজ্জথ [উপপজ্জথ (বহূসু)];

তত্থ চিত্তং পণিধায, উপপন্নম্হি নন্দনং.

২৪২. ‘‘নাকাসিং সত্থু ৱচনং, বুদ্ধস্সাদিচ্চবন্ধুনো;

হীনে চিত্তং পণিধায, সাম্হি পচ্ছানুতাপিনী’’তি.

২৪৩. ‘‘কীৱ চিৰং ৱিমানম্হি, ইধ ৱচ্ছসুপোসথে [ৱস্সসুপোসথে (সী.)];

দেৱতে পুচ্ছিতাচিক্খ, যদি জানাসি আযুনো’’তি.

২৪৪. ‘‘সট্ঠিৱস্সসহস্সানি [সট্ঠি সতসহস্সানি (?)], তিস্সো চ ৱস্সকোটিযো;

ইধ ঠত্ৱা মহামুনি, ইতো চুতা গমিস্সামি;

মনুস্সানং সহব্যত’’ন্তি.

২৪৫. ‘‘মা ত্ৱং উপোসথে ভাযি, সম্বুদ্ধেনাসি ব্যাকতা;

সোতাপন্না ৱিসেসযি, পহীনা তৱ দুগ্গতী’’তি.

উপোসথাৱিমানং সত্তমং.