৫. ভদ্দিত্থিৱিমানৱত্থু

২০৬. ‘‘নীলা পীতা চ কাড়া চ, মঞ্জিট্ঠা [মঞ্জেট্ঠা (সী.), মঞ্জট্ঠা (পী.)] অথ লোহিতা;

উচ্চাৱচানং ৱণ্ণানং, কিঞ্জক্খপৰিৱাৰিতা.

২০৭. ‘‘মন্দাৰৱানং পুপ্ফানং, মালং ধাৰেসি মুদ্ধনি;

নযিমে অঞ্ঞেসু কাযেসু, ৰুক্খা সন্তি সুমেধসে.

২০৮. ‘‘কেন কাযং উপপন্না, তাৱতিংসং যসস্সিনী;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

২০৯. ‘‘ভদ্দিত্থিকাতি [ভদ্দিত্থীতি (সী.)] মং অঞ্ঞংসু, কিমিলাযং উপাসিকা;

সদ্ধা সীলেন সম্পন্না, সংৱিভাগৰতা সদা.

২১০. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৱিপ্পসন্নেন চেতসা.

২১১. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

২১২. ‘‘উপোসথং উপৱসিস্সং, সদা সীলেসু সংৱুতা;

সঞ্ঞমা সংৱিভাগা চ, ৱিমানং আৱসামহং.

২১৩. ‘‘পাণাতিপাতা ৱিৰতা, মুসাৱাদা চ সঞ্ঞতা;

থেয্যা চ অতিচাৰা চ, মজ্জপানা চ আৰকা.

২১৪. ‘‘পঞ্চসিক্খাপদে ৰতা, অৰিযসচ্চান কোৱিদা;

উপাসিকা চক্খুমতো, অপ্পমাদৱিহাৰিনী.

কতাৱাসা কতকুসলা ততো চুতা [কতাৱকাসা কতকুসলা (ক.)],

সযং পভা অনুৱিচৰামি নন্দনং.

২১৫. ‘‘ভিক্খূ চাহং পৰমহিতানুকম্পকে, অভোজযিং তপস্সিযুগং মহামুনিং;

কতাৱাসা কতকুসলা ততো চুতা [কতাৱকাসা কতকুসলা (ক.)], সযং পভা অনুৱিচৰামি নন্দনং.

২১৬. ‘‘অট্ঠঙ্গিকং অপৰিমিতং সুখাৱহং, উপোসথং সততমুপাৱসিং অহং;

কতাৱাসা কতকুসলা ততো চুতা [কতাৱকাসা কতকুসলা (ক.)], সযং পভা অনুৱিচৰামি নন্দন’’ন্তি.

ভদ্দিত্থিৱিমানং [ভদ্দিত্থিকাৱিমানং (স্যা.)] পঞ্চমং.