৩. আচামদাযিকাৱিমানৱত্থু

১৮৫. ‘‘পিণ্ডায তে চৰন্তস্স, তুণ্হীভূতস্স তিট্ঠতো;

দলিদ্দা কপণা নাৰী, পৰাগাৰং অপস্সিতা [অৱস্সিতা (সী.)].

১৮৬. ‘‘যা তে অদাসি আচামং, পসন্না সেহি পাণিভি;

সা হিত্ৱা মানুসং দেহং, কং নু সা দিসতং গতা’’তি.

১৮৭. ‘‘পিণ্ডায মে চৰন্তস্স, তুণ্হীভূতস্স তিট্ঠতো;

দলিদ্দা কপণা নাৰী, পৰাগাৰং অপস্সিতা.

১৮৮. ‘‘যা মে অদাসি আচামং, পসন্না সেহি পাণিভি;

সা হিত্ৱা মানুসং দেহং, ৱিপ্পমুত্তা ইতো চুতা.

১৮৯. ‘‘নিম্মানৰতিনো নাম, সন্তি দেৱা মহিদ্ধিকা;

তত্থ সা সুখিতা নাৰী, মোদতাচামদাযিকা’’তি.

১৯০. ‘‘অহো দানং ৱৰাকিযা, কস্সপে সুপ্পতিট্ঠিতং;

পৰাভতেন দানেন, ইজ্ঝিত্থ ৱত দক্খিণা.

১৯১. ‘‘যা মহেসিত্তং কাৰেয্য, চক্কৱত্তিস্স ৰাজিনো;

নাৰী সব্বঙ্গকল্যাণী, ভত্তু চানোমদস্সিকা;

এতস্সাচামদানস্স, কলং নাগ্ঘতি সোড়সিং.

১৯২. ‘‘সতং নিক্খা সতং অস্সা, সতং অস্সতৰীৰথা;

সতং কঞ্ঞাসহস্সানি, আমুত্তমণিকুণ্ডলা;

এতস্সাচামদানস্স, কলং নাগ্ঘন্তি সোড়সিং.

১৯৩. ‘‘সতং হেমৱতা নাগা, ঈসাদন্তা উৰূড়্হৱা;

সুৱণ্ণকচ্ছা মাতঙ্গা, হেমকপ্পনৱাসসা [হেমকপ্পনিৱাসসা (স্যা. ক.)];

এতস্সাচামদানস্স, কলং নাগ্ঘতি সোড়সিং.

১৯৪. ‘‘চতুন্নমপি দীপানং, ইস্সৰং যোধ কাৰযে;

এতস্সাচামদানস্স, কলং নাগ্ঘতি সোড়সি’’ন্তি.

আচামদাযিকাৱিমানং ততিযং.