১. দাসিৱিমানৱত্থু

১৫৭. ‘‘অপি সক্কোৱ দেৱিন্দো, ৰম্মে চিত্তলতাৱনে;

সমন্তা অনুপৰিযাসি, নাৰীগণপুৰক্খতা;

ওভাসেন্তী দিসা সব্বা, ওসধী ৱিয তাৰকা.

১৫৮. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১৫৯. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

১৬০. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

১৬১. ‘‘অহং মনুস্সেসু মনুস্সভূতা, দাসী অহোসিং পৰপেস্সিযা [পৰপেসিযা (ক.)] কুলে.

১৬২. ‘‘উপাসিকা চক্খুমতো, গোতমস্স যসস্সিনো;

তস্সা মে নিক্কমো আসি, সাসনে তস্স তাদিনো.

১৬৩. ‘‘কামং ভিজ্জতুযং কাযো, নেৱ অত্থেত্থ সণ্ঠনং [সন্থনং (সী. স্যা. পী.)];

সিক্খাপদানং পঞ্চন্নং, মগ্গো সোৱত্থিকো সিৱো.

১৬৪. ‘‘অকণ্টকো অগহনো, উজু সব্ভি পৱেদিতো;

নিক্কমস্স ফলং পস্স, যথিদং পাপুণিত্থিকা.

১৬৫. ‘‘আমন্তনিকা ৰঞ্ঞোম্হি, সক্কস্স ৱসৱত্তিনো;

সট্ঠি তুৰিয [তুৰিয (সী. স্যা. পী.)] সহস্সানি, পটিবোধং কৰোন্তি মে.

১৬৬. ‘‘আলম্বো গগ্গৰো [গগ্গমো (স্যা.), ভগ্গৰো (ক.)] ভীমো [ভিম্মো (ক.)], সাধুৱাদী চ সংসযো;

পোক্খৰো চ সুফস্সো চ, ৱিণামোক্খা [ৱিলামোক্খা (ক.)] চ নাৰিযো.

১৬৭. ‘‘নন্দা চেৱ সুনন্দা চ, সোণদিন্না সুচিম্হিতা [সুচিম্ভিকা (স্যা.)];

অলম্বুসা মিস্সকেসী চ, পুণ্ডৰীকাতি দাৰুণী.

১৬৮. ‘‘এণীফস্সা সুফস্সা চ, সুভদ্দা মুদুৱাদিনী;

এতা চঞ্ঞা চ সেয্যাসে, অচ্ছৰানং পবোধিকা.

১৬৯. ‘‘তা মং কালেনুপাগন্ত্ৱা, অভিভাসন্তি দেৱতা;

হন্দ নচ্চাম গাযাম, হন্দ তং ৰমযামসে.

১৭০. ‘‘নযিদং অকতপুঞ্ঞানং, কতপুঞ্ঞানমেৱিদং;

অসোকং নন্দনং ৰম্মং, তিদসানং মহাৱনং.

১৭১. ‘‘সুখং অকতপুঞ্ঞানং, ইধ নত্থি পৰত্থ চ;

সুখঞ্চ কতপুঞ্ঞানং, ইধ চেৱ পৰত্থ চ.

১৭২. ‘‘তেসং সহব্যকামানং, কত্তব্বং কুসলং বহুং;

কতপুঞ্ঞা হি মোদন্তি, সগ্গে ভোগসমঙ্গিনো’’তি.

দাসিৱিমানং পঠমং.