৮. ততিযনাৱাৱিমানৱত্থু

৬৩. ‘‘সুৱণ্ণচ্ছদনং নাৱং, নাৰি আৰুয্হ তিট্ঠসি;

ওগাহসি পোক্খৰণিং, পদ্মং ছিন্দসি পাণিনা.

৬৪. ‘‘কূটাগাৰা নিৱেসা তে, ৱিভত্তা ভাগসো মিতা;

দদ্দল্লমানা [দদ্দড়্হমানা (ক.)] আভন্তি, সমন্তা চতুৰো দিসা.

৬৫. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৬৬. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৬৭. সা দেৱতা অত্তমনা, সম্বুদ্ধেনেৱ পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

৬৮. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দিস্ৱান ভিক্খূ তসিতে কিলন্তে, উট্ঠায পাতুং উদকং অদাসিং.

৬৯. ‘‘যো ৱে কিলন্তান পিপাসিতানং, উট্ঠায পাতুং উদকং দদাতি;

সীতোদকা তস্স ভৱন্তি নজ্জো, পহূতমল্যা বহুপুণ্ডৰীকা.

৭০. ‘‘তং আপগা অনুপৰিযন্তি সব্বদা, সীতোদকা ৱালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৭১. ‘‘তং ভূমিভাগেহি উপেতৰূপং, ৱিমানসেট্ঠং ভুসসোভমানং;

তস্সীধ কম্মস্স অযং ৱিপাকো, এতাদিসং পুঞ্ঞকতা লভন্তি.

৭২. ‘‘কূটাগাৰা নিৱেসা মে, ৱিভত্তা ভাগসো মিতা;

দদ্দল্লমানা আভন্তি, সমন্তা চতুৰো দিসা.

৭৩. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৭৪. ‘‘অক্খামি তে বুদ্ধ মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতি;

এতস্স কম্মস্স ফলং মমেদং, অত্থায বুদ্ধো উদকং অপাযী’’তি [অপাসীতি (সী. স্যা. পী.)].

ততিযনাৱাৱিমানং অট্ঠমং.