৯. দীপৱিমানৱত্থু

৭৫. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

৭৬. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৭৭. ‘‘কেন ত্ৱং ৱিমলোভাসা, অতিৰোচসি দেৱতা [দেৱতে (বহূসু) ৮৩ ৱিস্সজ্জনগাথায সংসন্দেতব্বং];

কেন তে সব্বগত্তেহি, সব্বা ওভাসতে দিসা.

৭৮. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৭৯. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

৮০. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

তমন্ধকাৰম্হি তিমীসিকাযং, পদীপকালম্হি অদাসি দীপং [অদং পদীপং (সী. স্যা. পী.)].

৮১. ‘‘যো অন্ধকাৰম্হি তিমীসিকাযং, পদীপকালম্হি দদাতি দীপং;

উপ্পজ্জতি জোতিৰসং ৱিমানং, পহূতমল্যং বহুপুণ্ডৰীকং.

৮২. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৮৩. ‘‘তেনাহং ৱিমলোভাসা, অতিৰোচামি দেৱতা;

তেন মে সব্বগত্তেহি, সব্বা ওভাসতে দিসা.

৮৪. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

দীপৱিমানং নৱমং.