৭. দুতিযনাৱাৱিমানৱত্থু

৫৩. ‘‘সুৱণ্ণচ্ছদনং নাৱং, নাৰি আৰুয্হ তিট্ঠসি;

ওগাহসি পোক্খৰণিং, পদ্মং ছিন্দসি পাণিনা.

৫৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৫৫. ‘‘পুচ্ছামি তং দেৱি মহানুভাৱে, মনুস্সভুতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৫৬. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

৫৭. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দিস্ৱান ভিক্খুং তসিতং কিলন্তং, উট্ঠায পাতুং উদকং অদাসিং.

৫৮. ‘‘যো ৱে কিলন্তস্স পিপাসিতস্স, উট্ঠায পাতুং উদকং দদাতি;

সীতোদকা তস্স ভৱন্তি নজ্জো, পহূতমল্যা বহুপুণ্ডৰীকা.

৫৯. ‘‘তং আপগা অনুপৰিযন্তি সব্বদা, সীতোদকা ৱালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৬০. ‘‘তং ভূমিভাগেহি উপেতৰূপং, ৱিমানসেট্ঠং ভুসসোভমানং;

তস্সীধ কম্মস্স অযং ৱিপাকো, এতাদিসং পুঞ্ঞকতা লভন্তি.

৬১. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৬২. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

দুতিযনাৱাৱিমানং সত্তমং.