৬. পঠমনাৱাৱিমানৱত্থু

৪৩. ‘‘সুৱণ্ণচ্ছদনং নাৱং, নাৰি আৰুয্হ তিট্ঠসি;

ওগাহসি পোক্খৰণিং, পদ্মং [পদুমং (সী. স্যা.)] ছিন্দসি পাণিনা.

৪৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৪৫. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৪৬. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

৪৭. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দিস্ৱান ভিক্খূ তসিতে কিলন্তে, উট্ঠায পাতুং উদকং অদাসিং.

৪৮. ‘‘যো ৱে কিলন্তান পিপাসিতানং, উট্ঠায পাতুং উদকং দদাতি;

সীতোদকা [সীতোদিকা (সী.)] তস্স ভৱন্তি নজ্জো, পহূতমল্যা বহুপুণ্ডৰীকা.

৪৯. ‘‘তং আপগা [তমাপগা (সী. ক.)] অনুপৰিযন্তি সব্বদা, সীতোদকা ৱালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৫০. ‘‘তং ভূমিভাগেহি উপেতৰূপং, ৱিমানসেট্ঠং ভুসসোভমানং;

তস্সীধ [তস্সেৱ (স্যা.)] কম্মস্স অযং ৱিপাকো, এতাদিসং পুঞ্ঞকতা [কতপুঞ্ঞা (সী.)] লভন্তি.

৫১. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৫২. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

পঠমনাৱাৱিমানং ছট্ঠং.