১৭. কেসকাৰীৱিমানৱত্থু

১৫০. ‘‘ইদং ৱিমানং ৰুচিৰং পভস্সৰং, ৱেড়ুৰিযথম্ভং সততং সুনিম্মিতং;

সুৱণ্ণৰুক্খেহি সমন্তমোত্থতং, ঠানং মমং কম্মৱিপাকসম্ভৱং.

১৫১. ‘‘তত্ৰূপপন্না পুৰিমচ্ছৰা ইমা, সতং সহস্সানি সকেন কম্মুনা;

তুৱংসি অজ্ঝুপগতা যসস্সিনী, ওভাসযং তিট্ঠসি পুব্বদেৱতা.

১৫২. ‘‘সসী অধিগ্গয্হ যথা ৱিৰোচতি, নক্খত্তৰাজাৰিৱ তাৰকাগণং;

তথেৱ ত্ৱং অচ্ছৰাসঙ্গণং [অচ্ছৰাসঙ্গমং (সী.)] ইমং, দদ্দল্লমানা যসসা ৱিৰোচসি.

১৫৩. ‘‘কুতো নু আগম্ম অনোমদস্সনে, উপপন্না ত্ৱং ভৱনং মমং ইদং;

ব্ৰহ্মংৱ দেৱা তিদসা সহিন্দকা, সব্বে ন তপ্পামসে দস্সনেন ত’’ন্তি.

১৫৪. ‘‘যমেতং সক্ক অনুপুচ্ছসে মমং, ‘কুতো চুতা ত্ৱং ইধ আগতা’তি [কুতো চুতা ইধ আগতা তুৱং (স্যা.), কুতো চুতায আগতি তৱ (পী.)];

বাৰাণসী নাম পুৰত্থি কাসিনং, তত্থ অহোসিং পুৰে কেসকাৰিকা.

১৫৫. ‘‘বুদ্ধে চ ধম্মে চ পসন্নমানসা, সঙ্ঘে চ একন্তগতা অসংসযা;

অখণ্ডসিক্খাপদা আগতপ্ফলা, সম্বোধিধম্মে নিযতা অনামযা’’তি.

১৫৬. ‘‘তন্ত্যাভিনন্দামসে স্ৱাগতঞ্চ [সাগতঞ্চ (সী.)] তে, ধম্মেন চ ত্ৱং যসসা ৱিৰোচসি;

বুদ্ধে চ ধম্মে চ পসন্নমানসে, সঙ্ঘে চ একন্তগতে অসংসযে;

অখণ্ডসিক্খাপদে আগতপ্ফলে, সম্বোধিধম্মে নিযতে অনামযে’’তি.

কেসকাৰীৱিমানং সত্তৰসমং.

পীঠৱগ্গো পঠমো নিট্ঠিতো.

তস্সুদ্দানং –

পঞ্চ পীঠা তযো নাৱা, দীপতিলদক্খিণা দ্ৱে;

পতি দ্ৱে সুণিসা উত্তৰা, সিৰিমা কেসকাৰিকা;

ৱগ্গো তেন পৱুচ্চতীতি.