১৬. সিৰিমাৱিমানৱত্থু

১৩৭. ‘‘যুত্তা চ তে পৰমঅলঙ্কতা হযা, অধোমুখা অঘসিগমা বলী জৱা;

অভিনিম্মিতা পঞ্চৰথাসতা চ তে, অন্ৱেন্তি তং সাৰথিচোদিতা হযা.

১৩৮. ‘‘সা তিট্ঠসি ৰথৱৰে অলঙ্কতা, ওভাসযং জলমিৱ জোতি পাৱকো;

পুচ্ছামি তং ৱৰতনু [ৱৰচাৰু (কত্থচি)] অনোমদস্সনে, কস্মা নু কাযা অনধিৱৰং উপাগমি.

১৩৯. ‘‘কামগ্গপত্তানং যমাহুনুত্তৰং [… নুত্তৰা (ক.), অনুত্তৰা (স্যা.)], নিম্মায নিম্মায ৰমন্তি দেৱতা;

তস্মা কাযা অচ্ছৰা কামৱণ্ণিনী, ইধাগতা অনধিৱৰং নমস্সিতুং.

১৪০. ‘‘কিং ত্ৱং পুৰে সুচৰিতমাচৰীধ [সুচৰিতং অচাৰিধ (পী.)],

কেনচ্ছসি ত্ৱং অমিতযসা সুখেধিতা;

ইদ্ধী চ তে অনধিৱৰা ৱিহঙ্গমা,

ৱণ্ণো চ তে দস দিসা ৱিৰোচতি.

১৪১. ‘‘দেৱেহি ত্ৱং পৰিৱুতা সক্কতা চসি,

কুতো চুতা সুগতিগতাসি দেৱতে;

কস্স ৱা ত্ৱং ৱচনকৰানুসাসনিং,

আচিক্খ মে ত্ৱং যদি বুদ্ধসাৱিকা’’তি.

১৪২. ‘‘নগন্তৰে নগৰৱৰে সুমাপিতে, পৰিচাৰিকা ৰাজৱৰস্স সিৰিমতো;

নচ্চে গীতে পৰমসুসিক্খিতা অহুং, সিৰিমাতি মং ৰাজগহে অৱেদিংসু [অৱেদিসুং (?)].

১৪৩. ‘‘বুদ্ধো চ মে ইসিনিসভো ৱিনাযকো, অদেসযী সমুদযদুক্খনিচ্চতং;

অসঙ্খতং দুক্খনিৰোধসস্সতং, মগ্গঞ্চিমং অকুটিলমঞ্জসং সিৱং.

১৪৪. ‘‘সুত্ৱানহং অমতপদং অসঙ্খতং, তথাগতস্সনধিৱৰস্স সাসনং;

সীলেস্ৱহং পৰমসুসংৱুতা অহুং, ধম্মে ঠিতা নৰৱৰবুদ্ধদেসিতে [ভাসিতে (সী.)].

১৪৫. ‘‘ঞত্ৱানহং ৱিৰজপদং অসঙ্খতং, তথাগতেননধিৱৰেন দেসিতং;

তত্থেৱহং সমথসমাধিমাফুসিং, সাযেৱ মে পৰমনিযামতা অহু.

১৪৬. ‘‘লদ্ধানহং অমতৱৰং ৱিসেসনং, একংসিকা অভিসমযে ৱিসেসিয;

অসংসযা বহুজনপূজিতা অহং, খিড্ডাৰতিং [খিড্ডং ৰতিং (স্যা. পী.)] পচ্চনুভোমনপ্পকং.

১৪৭. ‘‘এৱং অহং অমতদসম্হি [অমতৰসম্হি (ক.)] দেৱতা, তথাগতস্সনধিৱৰস্স সাৱিকা;

ধম্মদ্দসা পঠমফলে পতিট্ঠিতা, সোতাপন্না ন চ পন মত্থি দুগ্গতি.

১৪৮. ‘‘সা ৱন্দিতুং অনধিৱৰং উপাগমিং, পাসাদিকে কুসলৰতে চ ভিক্খৱো;

নমস্সিতুং সমণসমাগমং সিৱং, সগাৰৱা সিৰিমতো ধম্মৰাজিনো.

১৪৯. ‘‘দিস্ৱা মুনিং মুদিতমনম্হি পীণিতা, তথাগতং নৰৱৰদম্মসাৰথিং;

তণ্হচ্ছিদং কুসলৰতং ৱিনাযকং, ৱন্দামহং পৰমহিতানুকম্পক’’ন্তি.

সিৰিমাৱিমানং সোড়সমং.