১৫. উত্তৰাৱিমানৱত্থু

১২৪. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

১২৫. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১২৬. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

১২৭. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

১২৮. ‘‘ইস্সা চ মচ্ছেৰমথো [মচ্ছৰিযমথো চ (ক.)] পড়াসো, নাহোসি ময্হং ঘৰমাৱসন্তিযা;

অক্কোধনা ভত্তুৱসানুৱত্তিনী, উপোসথে নিচ্চহমপ্পমত্তা.

১২৯. ‘‘চাতুদ্দসিং পঞ্চদসিং, যা চ [যাৱ (সী. অট্ঠ., ক. অট্ঠ.) থেৰীগাথাঅট্ঠকথা পস্সিতব্বা] পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

১৩০. ‘‘উপোসথং উপৱসিস্সং, সদা সীলেসু সংৱুতা;

সঞ্ঞমা সংৱিভাগা চ, ৱিমানং আৱসামহং [আৱসামিমং (সী. অট্ঠ., ক.) পৰতো পন সব্বত্থপি ‘‘আৱসামহং’’ ইচ্চেৱ দিস্সতি].

১৩১. ‘‘পাণাতিপাতা ৱিৰতা, মুসাৱাদা চ সঞ্ঞতা;

থেয্যা চ অতিচাৰা চ, মজ্জপানা চ আৰকা [আৰতা (?)].

১৩২. ‘‘পঞ্চসিক্খাপদে ৰতা, অৰিযসচ্চান কোৱিদা;

উপাসিকা চক্খুমতো, গোতমস্স যসস্সিনো.

১৩৩. ‘‘সাহং সকেন সীলেন, যসসা চ যসস্সিনী;

অনুভোমি সকং পুঞ্ঞং, সুখিতা চম্হিনামযা.

১৩৪. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১৩৫. ‘‘অক্খামি তে ভিক্খু মহানুভাৱ, মনুস্সভূতা যমহং অকাসিং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতীতি.

১৩৬. ‘‘মম চ, ভন্তে, ৱচনেন ভগৱতো পাদে সিৰসা ৱন্দেয্যাসি – ‘উত্তৰা নাম, ভন্তে, উপাসিকা ভগৱতো পাদে সিৰসা ৱন্দতী’তি. অনচ্ছৰিযং খো পনেতং, ভন্তে, যং মং ভগৱা অঞ্ঞতৰস্মিং সামঞ্ঞফলে ব্যাকৰেয্য [ব্যাকৰেয্যাতি (?)], তং ভগৱা সকদাগামিফলে ব্যাকাসী’’তি.

উত্তৰাৱিমানং পন্নৰসমং.