১১. পঠমপতিব্বতাৱিমানৱত্থু

৯৩. ‘‘কোঞ্চা মযূৰা দিৱিযা চ হংসা, ৱগ্গুস্সৰা কোকিলা সম্পতন্তি;

পুপ্ফাভিকিণ্ণং ৰম্মমিদং ৱিমানং, অনেকচিত্তং নৰনাৰিসেৱিতং [নৰনাৰীভি সেৱিতং (ক.)].

৯৪. ‘‘তত্থচ্ছসি দেৱি মহানুভাৱে, ইদ্ধী ৱিকুব্বন্তি অনেকৰূপা;

ইমা চ তে অচ্ছৰাযো সমন্ততো, নচ্চন্তি গাযন্তি পমোদযন্তি চ.

৯৫. ‘‘দেৱিদ্ধিপত্তাসি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৯৬. সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং.

৯৭. ‘‘অহং মনুস্সেসু মনুস্সভূতা, পতিব্বতানঞ্ঞমনা অহোসিং;

মাতাৱ পুত্তং অনুৰক্খমানা, কুদ্ধাপিহং [কুদ্ধাপহং (সী.)] নপ্ফৰুসং অৱোচং.

৯৮. ‘‘সচ্চে ঠিতা মোসৱজ্জং পহায, দানে ৰতা সঙ্গহিতত্তভাৱা;

অন্নঞ্চ পানঞ্চ পসন্নচিত্তা, সক্কচ্চ দানং ৱিপুলং অদাসিং.

৯৯. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১০০. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

পঠমপতিব্বতাৱিমানং একাদসমং.