৬. মহাকস্সপসুত্তং

৬. এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন আযস্মা মহাকস্সপো পিপ্পলিগুহাযং [পিপ্ফলিগুহাযং (স্যা.), সিম্বলিগুহাযং (ক.)] ৱিহৰতি আবাধিকো [আবাধিকো হোতি (স্যা. পী.)] দুক্খিতো বাড়্হগিলানো. অথ খো আযস্মা মহাকস্সপো অপৰেন সমযেন তম্হা আবাধা ৱুট্ঠাসি. অথ খো আযস্মতো মহাকস্সপস্স তম্হা আবাধা ৱুট্ঠিতস্স এতদহোসি – ‘‘যংনূনাহং ৰাজগহং পিণ্ডায পৱিসেয্য’’ন্তি.

তেন খো পন সমযেন পঞ্চমত্তানি দেৱতাসতানি উস্সুক্কং আপন্নানি হোন্তি আযস্মতো মহাকস্সপস্স পিণ্ডপাতপটিলাভায. অথ খো আযস্মা মহাকস্সপো তানি পঞ্চমত্তানি দেৱতাসতানি পটিক্খিপিত্ৱা পুব্বণ্হসমযং নিৱাসেত্ৱা পত্তচীৱৰমাদায ৰাজগহং পিণ্ডায পাৱিসি – যেন দলিদ্দৱিসিখা কপণৱিসিখা পেসকাৰৱিসিখা. অদ্দসা খো ভগৱা আযস্মন্তং মহাকস্সপং ৰাজগহে পিণ্ডায চৰন্তং যেন দলিদ্দৱিসিখা কপণৱিসিখা পেসকাৰৱিসিখা.

অথ খো ভগৱা এতমত্থং ৱিদিত্ৱা তাযং ৱেলাযং ইমং উদানং উদানেসি –

‘‘অনঞ্ঞপোসিমঞ্ঞাতং, দন্তং সাৰে পতিট্ঠিতং;

খীণাসৱং ৱন্তদোসং, তমহং ব্ৰূমি ব্ৰাহ্মণ’’ন্তি. ছট্ঠং;