১. ৱড্ঢমাতুথেৰীগাথা

২০৪. ‘‘মা সু তে ৱড্ঢ লোকম্হি, ৱনথো আহু কুদাচনং;

মা পুত্তক পুনপ্পুনং, অহু দুক্খস্স ভাগিমা.

২০৫. ‘‘সুখঞ্হি ৱড্ঢ মুনযো, অনেজা ছিন্নসংসযা;

সীতিভূতা দমপ্পত্তা, ৱিহৰন্তি অনাসৱা.

২০৬. ‘‘তেহানুচিণ্ণং ইসীভি, মগ্গং দস্সনপত্তিযা;

দুক্খস্সন্তকিৰিযায, ত্ৱং ৱড্ঢ অনুব্ৰূহয’’.

২০৭. ‘‘ৱিসাৰদাৱ ভণসি, এতমত্থং জনেত্তি মে;

মঞ্ঞামি নূন মামিকে, ৱনথো তে ন ৱিজ্জতি’’.

২০৮. ‘‘যে কেচি ৱড্ঢ সঙ্খাৰা, হীনা উক্কট্ঠমজ্ঝিমা;

অণূপি অণুমত্তোপি, ৱনথো মে ন ৱিজ্জতি.

২০৯. ‘‘সব্বে মে আসৱা খীণা, অপ্পমত্তস্স ঝাযতো;

তিস্সো ৱিজ্জা অনুপ্পত্তা, কতং বুদ্ধস্স সাসনং’’.

২১০. ‘‘উড়াৰং ৱত মে মাতা, পতোদং সমৱস্সৰি;

পৰমত্থসঞ্হিতা গাথা, যথাপি অনুকম্পিকা.

২১১. ‘‘তস্সাহং ৱচনং সুত্ৱা, অনুসিট্ঠিং জনেত্তিযা;

ধম্মসংৱেগমাপাদিং, যোগক্খেমস্স পত্তিযা.

২১২. ‘‘সোহং পধানপহিতত্তো, ৰত্তিন্দিৱমতন্দিতো;

মাতৰা চোদিতো সন্তো, অফুসিং সন্তিমুত্তমং’’.

… ৱড্ঢমাতা থেৰী….

নৱকনিপাতো নিট্ঠিতো.