১. সীসূপচালাথেৰীগাথা

১৯৬. ‘‘ভিক্খুনী সীলসম্পন্না, ইন্দ্ৰিযেসু সুসংৱুতা;

অধিগচ্ছে পদং সন্তং, অসেচনকমোজৱং’’.

১৯৭. ‘‘তাৱতিংসা চ যামা চ, তুসিতা চাপি দেৱতা;

নিম্মানৰতিনো দেৱা, যে দেৱা ৱসৱত্তিনো;

তত্থ চিত্তং পণীধেহি, যত্থ তে ৱুসিতং পুৰে’’.

১৯৮. ‘‘তাৱতিংসা চ যামা চ, তুসিতা চাপি দেৱতা;

নিম্মানৰতিনো দেৱা, যে দেৱা ৱসৱত্তিনো.

১৯৯. ‘‘কালং কালং ভৱাভৱং, সক্কাযস্মিং পুৰক্খতা;

অৱীতিৱত্তা সক্কাযং, জাতিমৰণসাৰিনো.

২০০. ‘‘সব্বো আদীপিতো লোকো, সব্বো লোকো পদীপিতো;

সব্বো পজ্জলিতো লোকো, সব্বো লোকো পকম্পিতো.

২০১. ‘‘অকম্পিযং অতুলিযং, অপুথুজ্জনসেৱিতং;

বুদ্ধো ধম্মমদেসেসি, তত্থ মে নিৰতো মনো.

২০২. ‘‘তস্সাহং ৱচনং সুত্ৱা, ৱিহৰিং সাসনে ৰতা;

তিস্সো ৱিজ্জা অনুপ্পত্তা, কতং বুদ্ধস্স সাসনং.

২০৩. ‘‘সব্বত্থ ৱিহতা নন্দী, তমোখন্ধো পদালিতো;

এৱং জানাহি পাপিম, নিহতো ত্ৱমসি অন্তক’’.

… সীসূপচালা থেৰী….

অট্ঠকনিপাতো নিট্ঠিতো.