১. যসৱতীপমুখঅট্ঠাৰসভিক্খুনীসহস্সঅপদানং

১. ‘‘ভৱা সব্বে পৰিক্খীণা, ভৱা সন্তি ৱিমোচিতা;

সব্বাসৱা চ নো নত্থি, আৰোচেম মহামুনে.

২. ‘‘পুৰিমং কুসলং কম্মং [পৰিকম্মঞ্চ কুসলং (স্যা.)], যং কিঞ্চি সাধুপত্থিতং;

পৰিভোগমযং দিন্নং, তুয্হত্থায মহামুনে.

৩. ‘‘বুদ্ধপচ্চেকবুদ্ধানং, সাৱকানঞ্চ পত্থিতং [বুদ্ধানং সাৱকানঞ্চ (সী. ক.)];

পৰিভোগমযং দিন্নং, তুয্হত্থায মহামুনে.

৪. ‘‘উচ্চনীচমযং কম্মং, ভিক্খূনং সাধুপত্থিতং;

উচ্চাকুলপৰিকম্মং, কতমেতং মহামুনে [কতম্হেহি মহামুনে (স্যা. পী.)].

৫. ‘‘তেনেৱ সুক্কমূলেন, চোদিতা কম্মসম্পদা;

মানুসিকমতিক্কন্তা, জাযিংসু খত্তিযে কুলে.

৬. ‘‘উপ্পত্তে চ কতে কম্মে, জাতিযা ৱাপি একতো;

পচ্ছিমে একতো জাতা, খত্তিযা কুলসম্ভৱা.

৭. ‘‘ৰূপৱতী ভোগৱতী, লাভসক্কাৰপূজিতা;

অন্তেপুৰে মহাৱীৰ, দেৱানং ৱিয নন্দনে.

৮. ‘‘নিব্বিন্দিত্ৱা অগাৰম্হা, পব্বজিম্হনগাৰিযং;

কতিপাহং উপাদায, সব্বা পত্তাম্হ নিব্বুতিং.

৯. ‘‘চীৱৰং পিণ্ডপাতঞ্চ, পচ্চযং সযনাসনং;

উপনেন্তি বহূ অম্হে, সদা সক্কতপূজিতা.

১০. ‘‘কিলেসা ঝাপিতা অম্হং, ভৱা সব্বে সমূহতা;

নাগীৱ বন্ধনং ছেত্ৱা, ৱিহৰাম অনাসৱা.

১১. ‘‘স্ৱাগতং ৱত নো আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১২. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং যসৱতীপমুখানি খত্তিযকঞ্ঞাভিক্খুনিযো অট্ঠাৰসসহস্সানি ভগৱতো সম্মুখা ইমা গাথাযো অভাসিত্থাতি.

যসৱতীপমুখঅট্ঠাৰসভিক্খুনীসহস্সাপদানং পঠমং.