৫. নন্দাথেৰীঅপদানং

১৬৬. ‘‘পদুমুত্তৰো নাম জিনো, সব্বধম্মান পাৰগূ;

ইতো সতসহস্সম্হি, কপ্পে উপ্পজ্জি নাযকো.

১৬৭. ‘‘ওৱাদকো ৱিঞ্ঞাপকো, তাৰকো সব্বপাণিনং;

দেসনাকুসলো বুদ্ধো, তাৰেসি জনতং বহুং.

১৬৮. ‘‘অনুকম্পকো কাৰুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

১৬৯. ‘‘এৱং নিৰাকুলং আসি, সুঞ্ঞতং তিত্থিযেহি চ;

ৱিচিত্তং অৰহন্তেহি, ৱসীভূতেহি তাদিভি.

১৭০. ‘‘ৰতনানট্ঠপঞ্ঞাসং, উগ্গতোৱ মহামুনি;

কঞ্চনগ্ঘিযসঙ্কাসো, বাত্তিংসৱৰলক্খণো.

১৭১. ‘‘ৱস্সসতসহস্সানি, আযু ৱিজ্জতি তাৱদে;

তাৱতা তিট্ঠমানো সো, তাৰেসি জনতং বহুং.

১৭২. ‘‘তদাহং হংসৱতিযং, জাতা সেট্ঠিকুলে অহুং;

নানাৰতনপজ্জোতে, মহাসুখসমপ্পিতা.

১৭৩. ‘‘উপেত্ৱা তং মহাৱীৰং, অস্সোসিং ধম্মদেসনং;

অমতং পৰমস্সাদং, পৰমত্থনিৱেদকং.

১৭৪. ‘‘তদা নিমন্তযিত্ৱান, সসঙ্ঘং লোকনাযকং;

দত্ৱা তস্স মহাদানং, পসন্না সেহি পাণিভি.

১৭৫. ‘‘ঝাযিনীনং ভিক্খুনীনং, অগ্গট্ঠানমপত্থযিং;

নিপচ্চ সিৰসা ধীৰং, সসঙ্ঘং লোকনাযকং.

১৭৬. ‘‘তদা অদন্তদমকো, তিলোকসৰণো পভূ;

ব্যাকাসি নৰসাৰথি, ‘লচ্ছসে তং সুপত্থিতং.

১৭৭. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৭৮. ‘‘‘তস্স ধম্মেসু দাযাদা, ওৰসা ধম্মনিম্মিতা;

নন্দাতি নাম নামেন, হেস্সতি সত্থু সাৱিকা’.

১৭৯. ‘‘তং সুত্ৱা মুদিতা হুত্ৱা, যাৱজীৱং তদা জিনং;

মেত্তচিত্তা পৰিচৰিং, পচ্চযেহি ৱিনাযকং.

১৮০. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১৮১. ‘‘ততো চুতা যামমগং, ততোহং তুসিতং গতা [অগং (সী. পী. ক.)];

ততো চ নিম্মানৰতিং, ৱসৱত্তিপুৰং ততো [গতা (স্যা.)].

১৮২. ‘‘যত্থ যত্থূপপজ্জামি, তস্স কম্মস্স ৱাহসা;

তত্থ তত্থেৱ ৰাজূনং, মহেসিত্তমকাৰযিং.

১৮৩. ‘‘ততো চুতা মনুস্সত্তে, ৰাজানং চক্কৱত্তিনং;

মণ্ডলীনঞ্চ ৰাজূনং, মহেসিত্তমকাৰযিং.

১৮৪. ‘‘সম্পত্তিং অনুভোত্ৱান, দেৱেসু মনুজেসু চ;

সব্বত্থ সুখিতা হুত্ৱা, নেককপ্পেসু সংসৰিং.

১৮৫. ‘‘পচ্ছিমে ভৱে সম্পত্তে, সুৰম্মে [পুৰস্মিং (স্যা.)] কপিলৱ্হযে;

ৰঞ্ঞো সুদ্ধোদনস্সাহং, ধীতা আসিং অনিন্দিতা.

১৮৬. ‘‘সিৰিযা [সিৰিংৱ (সী.), ৰংসিৰিৱ (স্যা.)] ৰূপিনিং দিস্ৱা, নন্দিতং আসি তং কুলং;

তেন নন্দাতি মে নামং, সুন্দৰং পৱৰং অহু.

১৮৭. ‘‘যুৱতীনঞ্চ সব্বাসং, কল্যাণীতি চ ৱিস্সুতা;

তস্মিম্পি নগৰে ৰম্মে, ঠপেত্ৱা তং যসোধৰং.

১৮৮. ‘‘জেট্ঠো ভাতা তিলোকগ্গো, পচ্ছিমো [মজ্ঝিমো (পী.)] অৰহা তথা;

একাকিনী গহট্ঠাহং, মাতৰা পৰিচোদিতা.

১৮৯. ‘‘‘সাকিযম্হি কুলে জাতা, পুত্তে বুদ্ধানুজা তুৱং;

নন্দেনপি ৱিনা ভূতা, অগাৰে কিং নু অচ্ছসি.

১৯০. ‘‘‘জৰাৱসানং যোব্বঞ্ঞং, ৰূপং অসুচিসম্মতং;

ৰোগন্তমপিচাৰোগ্যং, জীৱিতং মৰণন্তিকং.

১৯১. ‘‘‘ইদম্পি তে সুভং ৰূপং, সসীকন্তং মনোহৰং;

ভূসনানং অলঙ্কাৰং, সিৰিসঙ্ঘাটসন্নিভং.

১৯২. ‘‘‘পুঞ্জিতং লোকসাৰংৱ, নযনানং ৰসাযনং;

পুঞ্ঞানং কিত্তিজননং, উক্কাককুলনন্দনং.

১৯৩. ‘‘‘ন চিৰেনেৱ কালেন, জৰা সমধিসেস্সতি [সমভিভোস্সতি (সী. স্যা.), সমধিহেস্সতি (পী.)];

ৱিহায গেহং কাৰুঞ্ঞে [কাৰুঞ্ঞে (সী. পী.), পাৰয্হিং (স্যা.)], চৰ ধম্মমনিন্দিতে’.

১৯৪. ‘‘সুত্ৱাহং মাতু ৱচনং, পব্বজিং অনগাৰিযং;

দেহেন ন তু চিত্তেন, ৰূপযোব্বনলাড়িতা.

১৯৫. ‘‘মহতা চ পযত্তেন, ঝানজ্ঝেন পৰং মম;

কাতুঞ্চ ৱদতে মাতা, ন চাহং তত্থ উস্সুকা.

১৯৬. ‘‘ততো মহাকাৰুণিকো, দিস্ৱা মং কামলালসং [কমলাননং (স্যা.)];

নিব্বিন্দনত্থং ৰূপস্মিং, মম চক্খুপথে জিনো.

১৯৭. ‘‘সকেন আনুভাৱেন, ইত্থিং মাপেসি সোভিনিং;

দস্সনীযং সুৰুচিৰং, মমতোপি সুৰূপিনিং.

১৯৮. ‘‘তমহং ৱিম্হিতা দিস্ৱা, অতিৱিম্হিতদেহিনিং;

চিন্তযিং সফলং মেতি, নেত্তলাভঞ্চ মানুসং.

১৯৯. ‘‘তমহং এহি সুভগে, যেনত্থো তং ৱদেহি মে;

কুলং তে নামগোত্তঞ্চ, ৱদ মে যদি তে পিযং.

২০০. ‘ন ৱঞ্চকালো সুভগে [পঞ্হকালো সুভণে (সী. স্যা. পী.)], উচ্ছঙ্গে মং নিৱাসয;

সীদন্তীৱ মমঙ্গানি, পসুপ্পয মুহুত্তকং’.

২০১. ‘‘ততো সীসং মমঙ্কে সা, কত্ৱা সযি সুলোচনা;

তস্সা নলাটে পতিতা, লুদ্ধা [লূতা (স্যা.)] পৰমদাৰুণা.

২০২. ‘‘সহ তস্সা নিপাতেন, পিড়কা উপপজ্জথ;

পগ্ঘৰিংসু পভিন্না চ, কুণপা পুব্বলোহিতা.

২০৩. ‘‘পভিন্নং ৱদনঞ্চাপি, কুণপং পূতিগন্ধনং;

উদ্ধুমাতং ৱিনিলঞ্চ, পুব্বঞ্চাপি সৰীৰকং.

২০৪. ‘‘সা পৱেদিতসব্বঙ্গী, নিস্সসন্তী মুহুং মুহুং;

ৱেদযন্তী সকং দুক্খং, কৰুণং পৰিদেৱযি.

২০৫. ‘‘‘দুক্খেন দুক্খিতা হোমি, ফুসযন্তি চ ৱেদনা;

মহাদুক্খে নিমুগ্গম্হি, সৰণং হোহি মে সখী’.

২০৬. ‘‘‘কুহিং ৱদনসোভং তে, কুহিং তে তুঙ্গনাসিকা;

তম্ববিম্বৱৰোট্ঠং তে, ৱদনং তে কুহিং গতং.

২০৭. ‘‘‘কুহিং সসীনিভং ৱণ্ণং, কম্বুগীৱা কুহিং গতা;

দোড়ালোলাৱ [দামামালঞ্চ (স্যা.), দোলোলুল্লাৱ (ক.)] তে কণ্ণা, ৱেৱণ্ণং সমুপাগতা.

২০৮. ‘‘‘মকুড়খাৰকাকাৰা [মকুলম্বুৰূহাকাৰা (সী.), মকুড়পদুমাকাৰা (স্যা.)], কলিকাৱ [কলসাৱ (সী. স্যা. পী.)] পযোধৰা;

পভিন্না পূতিকুণপা, দুট্ঠগন্ধিত্তমাগতা.

২০৯. ‘‘‘ৱেদিমজ্ঝাৱ সুস্সোণী [তনুমজ্ঝা পুথুস্সোণী (সী. স্যা.), ৱেদিমজ্ঝা পুথুস্সোণী (পী.)], সূনাৱ নীতকিব্বিসা;

জাতা অমেজ্ঝভৰিতা, অহো ৰূপমসস্সতং.

২১০. ‘‘‘সব্বং সৰীৰসঞ্জাতং, পূতিগন্ধং ভযানকং;

সুসানমিৱ বীভচ্ছং, ৰমন্তে যত্থ বালিসা’.

২১১. ‘‘তদা মহাকাৰুণিকো, ভাতা মে লোকনাযকো;

দিস্ৱা সংৱিগ্গচিত্তং মং, ইমা গাথা অভাসথ.

২১২. ‘‘‘আতুৰং কুণপং পূতিং, পস্স নন্দে সমুস্সযং;

অসুভায চিত্তং ভাৱেহি, একগ্গং সুসমাহিতং.

২১৩. ‘‘‘যথা ইদং তথা এতং, যথা এতং তথা ইদং;

দুগ্গন্ধং পূতিকং ৱাতি, বালানং অভিনন্দিতং.

২১৪. ‘‘‘এৱমেতং অৱেক্খন্তী, ৰত্তিন্দিৱমতন্দিতা;

ততো সকায পঞ্ঞায, অভিনিব্বিজ্ঝ দক্খসি’.

২১৫. ‘‘ততোহং অতিসংৱিগ্গা, সুত্ৱা গাথা সুভাসিতা;

তত্ৰট্ঠিতাৱহং সন্তী, অৰহত্তমপাপুণিং.

২১৬. ‘‘যত্থ যত্থ নিসিন্নাহং, সদা ঝানপৰাযনা;

জিনো তস্মিং গুণে তুট্ঠো, এতদগ্গে ঠপেসি মং.

২১৭. ‘‘কিলেসা ঝাপিতা ময্হং…পে… ৱিহৰামি অনাসৱা.

২১৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

২১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নন্দা ভিক্খুনী জনপদকল্যাণী ইমা গাথাযো অভাসিত্থাতি.

নন্দাথেৰিযাপদানং পঞ্চমং.