৩. ধম্মদিন্নাথেৰীঅপদানং

৯৫. ‘‘পদুমুত্তৰো নাম জিনো, সব্বধম্মান পাৰগূ;

ইতো সতসহস্সম্হি, কপ্পে উপ্পজ্জি নাযকো.

৯৬. ‘‘তদাহং হংসৱতিযং, কুলে অঞ্ঞতৰে অহুং;

পৰকম্মকাৰী আসিং, নিপকা সীলসংৱুতা.

৯৭. ‘‘পদুমুত্তৰবুদ্ধস্স, সুজাতো অগ্গসাৱকো;

ৱিহাৰা অভিনিক্খম্ম, পিণ্ডপাতায [পত্তমাদায (ক.)] গচ্ছতি.

৯৮. ‘‘ঘটং গহেত্ৱা গচ্ছন্তী, তদা উদকহাৰিকা;

তং দিস্ৱা অদদং পূপং, পসন্না সেহি পাণিভি.

৯৯. ‘‘পটিগ্গহেত্ৱা তত্থেৱ, নিসিন্নো পৰিভুঞ্জি সো;

ততো নেত্ৱান তং গেহং, অদাসিং তস্স ভোজনং.

১০০. ‘‘ততো মে অয্যকো তুট্ঠো, অকৰী সুণিসং সকং;

সস্সুযা সহ গন্ত্ৱান, সম্বুদ্ধং অভিৱাদযিং.

১০১. ‘‘তদা সো ধম্মকথিকং, ভিক্খুনিং পৰিকিত্তযং;

ঠপেসি এতদগ্গম্হি, তং সুত্ৱা মুদিতা অহং.

১০২. ‘‘নিমন্তযিত্ৱা সুগতং, সসঙ্ঘং লোকনাযকং;

মহাদানং দদিত্ৱান, তং ঠানমভিপত্থযিং.

১০৩. ‘‘ততো মং সুগতো আহ, ঘননিন্নাদসুস্সৰো [ঘননিন্নাদসুস্সৰে (ক.)];

‘মমুপট্ঠাননিৰতে, সসঙ্ঘপৰিৱেসিকে.

১০৪. ‘‘‘সদ্ধম্মস্সৱনে যুত্তে, গুণৱদ্ধিতমানসে;

ভদ্দে ভৱস্সু মুদিতা, লচ্ছসে পণিধীফলং.

১০৫. ‘‘‘সতসহস্সিতো কপ্পে, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১০৬. ‘‘‘তস্স ধম্মেসু দাযাদা, ওৰসা ধম্মনিম্মিতা;

ধম্মদিন্নাতি নামেন, হেস্সতি সত্থু সাৱিকা’.

১০৭. ‘‘তং সুত্ৱা মুদিতা হুত্ৱা, যাৱজীৱং মহামুনিং;

মেত্তচিত্তা পৰিচৰিং, পচ্চযেহি ৱিনাযকং.

১০৮. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১০৯. ‘‘ইমম্হি ভদ্দকে কপ্পে, ব্ৰহ্মবন্ধু মহাযসো;

কস্সপো নাম গোত্তেন, উপ্পজ্জি ৱদতং ৱৰো.

১১০. ‘‘উপট্ঠাকো মহেসিস্স, তদা আসি নৰিস্সৰো;

কাসিৰাজা কিকী নাম, বাৰাণসিপুৰুত্তমে.

১১১. ‘‘ছট্ঠা তস্সাসহং ধীতা, সুধম্মা ইতি ৱিস্সুতা;

ধম্মং সুত্ৱা জিনগ্গস্স, পব্বজ্জং সমৰোচযিং.

১১২. ‘‘অনুজানি ন নো তাতো, অগাৰেৱ তদা মযং;

ৱীসৱস্সসহস্সানি, ৱিচৰিম্হ অতন্দিতা.

ততিযং ভাণৱাৰং.

১১৩. ‘‘কোমাৰিব্ৰহ্মচৰিযং, ৰাজকঞ্ঞা সুখেধিতা;

বুদ্ধোপট্ঠাননিৰতা, মুদিতা সত্ত ধীতৰো.

১১৪. ‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৱ সুধম্মা চ, সত্তমী সঙ্ঘদাযিকা.

১১৫. ‘‘খেমা উপ্পলৱণ্ণা চ, পটাচাৰা চ কুণ্ডলা;

গোতমী চ অহঞ্চেৱ, ৱিসাখা হোতি সত্তমী.

১১৬. ‘‘তেহি কম্মেহি সুকতেহি, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১১৭. ‘‘পচ্ছিমে চ ভৱে দানি, গিৰিব্বজপুৰুত্তমে;

জাতা সেট্ঠিকুলে ফীতে, সব্বকামসমিদ্ধিনে.

১১৮. ‘‘যদা ৰূপগুণূপেতা, পঠমে যোব্বনে ঠিতা;

তদা পৰকুলং গন্ত্ৱা, ৱসিং সুখসমপ্পিতা.

১১৯. ‘‘উপেত্ৱা লোকসৰণং, সুণিত্ৱা ধম্মদেসনং;

অনাগামিফলং পত্তো, সামিকো মে সুবুদ্ধিমা.

১২০. ‘‘তদাহং অনুজানেত্ৱা, পব্বজিং অনগাৰিযং;

ন চিৰেনেৱ কালেন, অৰহত্তমপাপুণিং.

১২১. ‘‘তদা উপাসকো সো মং, উপগন্ত্ৱা অপুচ্ছথ;

গম্ভীৰে নিপুণে পঞ্হে, তে সব্বে ব্যাকৰিং অহং.

১২২. ‘‘জিনো তস্মিং গুণে তুট্ঠো, এতদগ্গে ঠপেসি মং;

‘ভিক্খুনিং ধম্মকথিকং, নাঞ্ঞং পস্সামি এদিসিং.

১২৩. ‘ধম্মদিন্না যথা ধীৰা, এৱং ধাৰেথ ভিক্খৱো’;

‘‘এৱাহং পণ্ডিতা হোমি [জাতা (সী.), নাম (স্যা.)], নাযকেনানুকম্পিতা.

১২৪. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

১২৫. ‘‘যস্সত্থায পব্বজিতা, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

১২৬. ‘‘ইদ্ধীসু চ ৱসী হোমি, দিব্বায সোতধাতুযা;

পৰচিত্তানি জানামি, সত্থুসাসনকাৰিকা.

১২৭. ‘‘পুব্বেনিৱাসং জানামি, দিব্বচক্খু ৱিসোধিতং;

খেপেত্ৱা আসৱে সব্বে, ৱিসুদ্ধাসিং সুনিম্মলা.

১২৮. ‘‘কিলেসা ঝাপিতা ময্হং…পে… ৱিহৰামি অনাসৱা.

১২৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং ধম্মদিন্না ভিক্খুনী ইমা গাথাযো অভাসিত্থাতি.

ধম্মদিন্নাথেৰিযাপদানং ততিযং.