৫. নড়মালিকাথেৰীঅপদানং

৩৭. ‘‘চন্দভাগানদীতীৰে, অহোসিং কিন্নৰী তদা;

অদ্দসং ৱিৰজং বুদ্ধং, সযম্ভুং অপৰাজিতং.

৩৮. ‘‘পসন্নচিত্তা সুমনা, ৱেদজাতা কতঞ্জলী;

নড়মালং গহেত্ৱান, সযম্ভুং অভিপূজযিং.

৩৯. ‘‘তেন কম্মেন সুকতেন, চেতনাপণিধীহি চ;

জহিত্ৱা কিন্নৰীদেহং, অগচ্ছিং তিদসং গতিং.

৪০. ‘‘ছত্তিংসদেৱৰাজূনং, মহেসিত্তমকাৰযিং;

দসন্নং চক্কৱত্তীনং, মহেসিত্তমকাৰযিং;

সংৱেজেত্ৱান মে চিত্তং [ৱেদযিত্ৱান কুসলং (স্যা.), সংৱেদযিত্ৱা কুসলং (পী.)], পব্বজিং অনগাৰিযং.

৪১. ‘‘কিলেসা ঝাপিতা ময্হং, ভৱা সব্বে সমূহতা [ভৱা সংঘাতিতা মম (ক.)];

সব্বাসৱপৰিক্খীণা, নত্থি দানি পুনব্ভৱো.

৪২. ‘‘চতুন্নৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফপূজাযিদং ফলং.

৪৩. ‘‘কিলেসা ঝাপিতা ময্হং…পে… ৱিহৰামি অনাসৱা.

৪৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং নড়মালিকা থেৰী ইমা গাথাযো অভাসিত্থাতি.

নড়মালিকাথেৰিযাপদানং পঞ্চমং.