১১. একাদসনিপাতো

১. সংকিচ্চত্থেৰগাথা

৫৯৭. ‘‘কিং তৱত্থো ৱনে তাত, উজ্জুহানোৱ পাৱুসে;

ৱেৰম্ভা ৰমণীযা তে, পৱিৱেকো হি ঝাযিনং.

৫৯৮. ‘‘যথা অব্ভানি ৱেৰম্ভো, ৱাতো নুদতি পাৱুসে;

সঞ্ঞা মে অভিকিৰন্তি, ৱিৱেকপটিসঞ্ঞুতা.

৫৯৯. ‘‘অপণ্ডৰো অণ্ডসম্ভৱো, সীৱথিকায নিকেতচাৰিকো;

উপ্পাদযতেৱ মে সতিং, সন্দেহস্মিং ৱিৰাগনিস্সিতং.

৬০০. ‘‘যঞ্চ অঞ্ঞে ন ৰক্খন্তি, যো চ অঞ্ঞে ন ৰক্খতি;

স ৱে ভিক্খু সুখং সেতি, কামেসু অনপেক্খৱা.

৬০১. ‘‘অচ্ছোদিকা পুথুসিলা, গোনঙ্গুলমিগাযুতা;

অম্বুসেৱালসঞ্ছন্না, তে সেলা ৰমযন্তি মং.

৬০২. ‘‘ৱসিতং মে অৰঞ্ঞেসু, কন্দৰাসু গুহাসু চ;

সেনাসনেসু পন্তেসু, ৱাড়মিগনিসেৱিতে.

৬০৩. ‘‘‘ইমে হঞ্ঞন্তু ৱজ্ঝন্তু, দুক্খং পপ্পোন্তু পাণিনো’;

সঙ্কপ্পং নাভিজানামি, অনৰিযং দোসসংহিতং.

৬০৪. ‘‘পৰিচিণ্ণো মযা সত্থা, কতং বুদ্ধস্স সাসনং;

ওহিতো গৰুকো ভাৰো, ভৱনেত্তি সমূহতা.

৬০৫. ‘‘যস্স চত্থায [যস্সত্থায (সী.)] পব্বজিতো, অগাৰস্মানগাৰিযং;

সো মে অত্থো অনুপ্পত্তো, সব্বসংযোজনক্খযো.

৬০৬. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, নিব্বিসং ভতকো যথা.

৬০৭. ‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, সম্পজানো পতিস্সতো’’তি.

… সংকিচ্চো থেৰো….

একাদসনিপাতো নিট্ঠিতো.