৯. গূথখাদকপেতিৱত্থু

৭৭৪. ‘‘গূথকূপতো উগ্গন্ত্ৱা, কা নু দীনা পতিট্ঠসি;

নিস্সংসযং পাপকম্মন্তা, কিং নু সদ্দহসে তুৱ’’ন্তি.

৭৭৫. ‘‘অহং ভদন্তে পেতীম্হি, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’’তি.

৭৭৬. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, ইদং দুক্খং নিগচ্ছসী’’তি.

৭৭৭. ‘‘অহু আৱাসিকো ময্হং, ইস্সুকী কুলমচ্ছৰী;

অজ্ঝোসিতো ময্হং ঘৰে, কদৰিযো পৰিভাসকো.

৭৭৮. ‘‘তস্সাহং ৱচনং সুত্ৱা, ভিক্খৱো পৰিভাসিসং;

তস্স কম্মৱিপাকেন, পেতলোকং ইতো গতা’’তি.

৭৭৯. ‘‘অমিত্তো মিত্তৱণ্ণেন, যো তে আসি কুলূপকো;

কাযস্স ভেদা দুপ্পঞ্ঞো, কিং নু পেচ্চ গতিং গতো’’তি.

৭৮০. ‘‘তস্সেৱাহং পাপকম্মস্স, সীসে তিট্ঠামি মত্থকে;

সো চ পৰৱিসযং পত্তো, মমেৱ পৰিচাৰকো.

৭৮১. ‘‘যং ভদন্তে হদন্তঞ্ঞে, এতং মে হোতি ভোজনং;

অহঞ্চ খো যং হদামি, এতং সো উপজীৱতী’’তি.

গূথখাদকপেতিৱত্থু নৱমং.