৭. ৰাজপুত্তপেতৱত্থু

৭৫৩. পুব্বে কতানং কম্মানং, ৱিপাকো মথযে মনং;

ৰূপে সদ্দে ৰসে গন্ধে, ফোট্ঠব্বে চ মনোৰমে.

৭৫৪. নচ্চং গীতং ৰতিং খিড্ডং, অনুভুত্ৱা অনপ্পকং;

উয্যানে পৰিচৰিত্ৱা, পৱিসন্তো গিৰিব্বজং.

৭৫৫. ইসিং সুনেত্ত [সুনিত (ক.)] মদ্দক্খি, অত্তদন্তং সমাহিতং;

অপ্পিচ্ছং হিৰিসম্পন্নং, উঞ্ছে পত্তগতে ৰতং.

৭৫৬. হত্থিক্খন্ধতো ওৰুয্হ, লদ্ধা ভন্তেতি চাব্ৰৱি;

তস্স পত্তং গহেত্ৱান, উচ্চং পগ্গয্হ খত্তিযো.

৭৫৭. থণ্ডিলে পত্তং ভিন্দিত্ৱা, হসমানো অপক্কমি;

‘‘ৰঞ্ঞো কিতৱস্সাহং পুত্তো, কিং মং ভিক্খু কৰিস্সসি’’.

৭৫৮. তস্স কম্মস্স ফৰুসস্স, ৱিপাকো কটুকো অহু;

যং ৰাজপুত্তো ৱেদেসি, নিৰযম্হি সমপ্পিতো.

৭৫৯. ছড়েৱ চতুৰাসীতি, ৱস্সানি নৱুতানি চ;

ভুসং দুক্খং নিগচ্ছিত্থো, নিৰযে কতকিব্বিসো.

৭৬০. উত্তানোপি চ পচ্চিত্থ, নিকুজ্জো ৱামদক্খিণো;

উদ্ধংপাদো ঠিতো চেৱ, চিৰং বালো অপচ্চথ.

৭৬১. বহূনি ৱস্সসহস্সানি, পূগানি নহুতানি চ;

ভুসং দুক্খং নিগচ্ছিত্থো, নিৰযে কতকিব্বিসো.

৭৬২. এতাদিসং খো কটুকং, অপ্পদুট্ঠপ্পদোসিনং;

পচ্চন্তি পাপকম্মন্তা, ইসিমাসজ্জ সুব্বতং.

৭৬৩. সো তত্থ বহুৱস্সানি, ৱেদযিত্ৱা বহুং দুখং;

খুপ্পিপাসহতো নাম [খুপ্পিপাসাহতো নাম (সী. পী)], পেতো আসি ততো চুতো.

৭৬৪. এতমাদীনৱং ঞত্ৱা [দিস্ৱা (সী.)], ইস্সৰমদসম্ভৱং;

পহায ইস্সৰমদং, নিৱাতমনুৱত্তযে.

৭৬৫. দিট্ঠেৱ ধম্মে পাসংসো, যো বুদ্ধেসু সগাৰৱো;

কাযস্স ভেদা সপ্পঞ্ঞো, সগ্গং সো উপপজ্জতীতি.

ৰাজপুত্তপেতৱত্থু সত্তমং.