৬. পাটিহাৰিযকথা

৩০. ‘‘তীণিমানি, ভিক্খৱে [অ. নি. ৩.৬১ পস্সিতব্বা], পাটিহাৰিযানি. কতমানি তীণি? ইদ্ধিপাটিহাৰিযং, আদেসনাপাটিহাৰিযং, অনুসাসনীপাটিহাৰিযং.

‘‘কতমঞ্চ, ভিক্খৱে, ইদ্ধিপাটিহাৰিযং? ইধ, ভিক্খৱে, একচ্চো অনেকৱিহিতং ইদ্ধিৱিধং পচ্চনুভোতি – একোপি হুত্ৱা বহুধা হোতি, বহুধাপি হুত্ৱা একো হোতি; আৱিভাৱং তিৰোভাৱং…পে… যাৱ ব্ৰহ্মলোকাপি কাযেন ৱসং ৱত্তেতি. ইদং ৱুচ্চতি, ভিক্খৱে, ইদ্ধিপাটিহাৰিযং.

‘‘কতমঞ্চ, ভিক্খৱে, আদেসনাপাটিহাৰিযং? ইধ, ভিক্খৱে, একচ্চো নিমিত্তেন আদিসতি – ‘এৱম্পি তে মনো, ইত্থম্পি তে মনো, ইতিপি তে চিত্ত’ন্তি. সো বহুং চেপি আদিসতি, তথেৱ তং হোতি, নো অঞ্ঞথা. ইধ পন, ভিক্খৱে, একচ্চো ন হেৱ খো নিমিত্তেন আদিসতি, অপি চ খো মনুস্সানং ৱা অমনুস্সানং ৱা দেৱতানং ৱা সদ্দং সুত্ৱা আদিসতি – ‘এৱম্পি তে মনো, ইত্থম্পি তে মনো, ইতিপি তে চিত্ত’ন্তি. সো বহুং চেপি আদিসতি, তথেৱ তং হোতি, নো অঞ্ঞথা. ইধ পন, ভিক্খৱে, একচ্চো ন হেৱ খো নিমিত্তেন আদিসতি, নপি মনুস্সানং ৱা অমনুস্সানং ৱা দেৱতানং ৱা সদ্দং সুত্ৱা আদিসতি, অপি চ খো ৱিতক্কযতো ৱিচাৰযতো ৱিতক্কৱিপ্ফাৰসদ্দং সুত্ৱা আদিসতি – ‘এৱম্পি তে মনো, ইত্থম্পি তে মনো, ইতিপি তে চিত্ত’ন্তি. সো বহুং চেপি আদিসতি, তথেৱ তং হোতি, নো অঞ্ঞথা. ইধ পন, ভিক্খৱে, একচ্চো ন হেৱ খো নিমিত্তেন আদিসতি, নপি মনুস্সানং ৱা অমনুস্সানং ৱা দেৱতানং ৱা সদ্দং সুত্ৱা আদিসতি, নপি ৱিতক্কযতো ৱিচাৰযতো ৱিতক্কৱিপ্ফাৰসদ্দং সুত্ৱা আদিসতি, অপি চ খো অৱিতক্কং অৱিচাৰং সমাধিং সমাপন্নস্স চেতসা চেতো পৰিচ্চ পজানাতি – ‘যথা ইমস্স ভোতো মনোসঙ্খাৰা পণিহিতা ইমস্স [তথা ইমস্স (স্যা.), যথা ইমস্স (ক.) অ. নি. ৩.৬১ পস্সিতব্বা] চিত্তস্স অনন্তৰা অমুকং নাম ৱিতক্কং ৱিতক্কযিস্সতী’তি [ৱিতক্কেস্সতীতি (স্যা.) অ. নি. ৩.৬১]. সো বহুং চেপি আদিসতি, তথেৱ তং হোতি, নো অঞ্ঞথা. ইদং ৱুচ্চতি, ভিক্খৱে, আদেসনাপাটিহাৰিযং.

‘‘কতমঞ্চ, ভিক্খৱে, অনুসাসনীপাটিহাৰিযং? ইধ, ভিক্খৱে, একচ্চো এৱমনুসাসতি – ‘এৱং ৱিতক্কেথ, মা এৱং ৱিতক্কযিত্থ. এৱং মনসি কৰোথ, মা এৱং মনসি কৰিত্থ. ইদং পজহথ, ইদং উপসম্পজ্জ ৱিহৰথা’তি. ইদং ৱুচ্চতি, ভিক্খৱে, অনুসাসনীপাটিহাৰিযং. ইমানি খো, ভিক্খৱে, তীণি পাটিহাৰিযানি’’.

৩১. নেক্খম্মং ইজ্ঝতীতি – ইদ্ধি. কামচ্ছন্দং পটিহৰতীতি – পাটিহাৰিযং. যে তেন নেক্খম্মেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘তং খো পন নেক্খম্মং এৱং আসেৱিতব্বং, এৱং ভাৱেতব্বং, এৱং বহুলীকাতব্বং, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

অব্যাপাদো ইজ্ঝতীতি – ইদ্ধি. ব্যাপাদং পটিহৰতীতি – পাটিহাৰিযং. যে তেন অব্যাপাদেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘সো খো পন অব্যাপাদো এৱং আসেৱিতব্বো, এৱং ভাৱেতব্বো, এৱং বহুলীকাতব্বো, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

আলোকসঞ্ঞা ইজ্ঝতীতি – ইদ্ধি. থিনমিদ্ধং পটিহৰতীতি – পাটিহাৰিযং. যে তায আলোকসঞ্ঞায সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘সা খো পন আলোকসঞ্ঞা এৱং আসেৱিতব্বা, এৱং ভাৱেতব্বা, এৱং বহুলীকাতব্বা, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

অৱিক্খেপো ইজ্ঝতীতি – ইদ্ধি. উদ্ধচ্চং পটিহৰতীতি – পাটিহাৰিযং. যে তেন অৱিক্খেপেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘সো খো পন অৱিক্খেপো এৱং আসেৱিতব্বো, এৱং ভাৱেতব্বো, এৱং বহুলীকাতব্বো, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

ধম্মৱৱত্থানং ইজ্ঝতীতি – ইদ্ধি. ৱিচিকিচ্ছং পটিহৰতীতি – পাটিহাৰিযং. যে তেন ধম্মৱৱত্থানেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘তং খো পন ধম্মৱৱত্থানং এৱং আসেৱিতব্বং, এৱং ভাৱেতব্বং, এৱং বহুলীকাতব্বং, এৱং তদনুধম্মতা, সতি উপট্ঠাপেতব্বা’’তি – অনুসাসনীপাটিহাৰিযং.

ঞাণং ইজ্ঝতীতি – ইদ্ধি. অৱিজ্জং পটিহৰতীতি – পাটিহাৰিযং. যে তেন ঞাণেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘তং খো পন ঞাণং এৱং আসেৱিতব্বং, এৱং ভাৱেতব্বং, এৱং বহুলীকাতব্বং, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

পামোজ্জং ইজ্ঝতীতি – ইদ্ধি. অৰতিং পটিহৰতীতি – পাটিহাৰিযং. যে তেন পামোজ্জেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘তং খো পন পামোজ্জং এৱং আসেৱিতব্বং, এৱং ভাৱেতব্বং, এৱং বহুলীকাতব্বং, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং…পে….

পঠমং ঝানং ইজ্ঝতীতি – ইদ্ধি. নীৱৰণে পটিহৰতীতি – পাটিহাৰিযং. যে তেন পঠমেন ঝানেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘তং খো পন পঠমং ঝানং এৱং আসেৱিতব্বং, এৱং ভাৱেতব্বং, এৱং বহুলীকাতব্বং, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং…পে….

অৰহত্তমগ্গো ইজ্ঝতীতি – ইদ্ধি. সব্বকিলেসে পটিহৰতীতি – পাটিহাৰিযং. যে তেন অৰহত্তমগ্গেন সমন্নাগতা, সব্বে তে ৱিসুদ্ধচিত্তা অনাৱিলসঙ্কপ্পাতি – আদেসনাপাটিহাৰিযং. ‘‘সো খো পন অৰহত্তমগ্গো এৱং আসেৱিতব্বো, এৱং ভাৱেতব্বো, এৱং বহুলীকাতব্বো, এৱং তদনুধম্মতা সতি উপট্ঠাপেতব্বা’’তি – অনুসাসনীপাটিহাৰিযং.

৩২. নেক্খম্মং ইজ্ঝতীতি – ইদ্ধি. কামচ্ছন্দং পটিহৰতীতি – পাটিহাৰিযং. যা চ ইদ্ধি যঞ্চ পাটিহাৰিযং, ইদং ৱুচ্চতি ইদ্ধিপাটিহাৰিযং. অব্যাপাদো ইজ্ঝতীতি – ইদ্ধি. ব্যাপাদং পটিহৰতীতি – পাটিহাৰিযং. যা চ ইদ্ধি যঞ্চ পাটিহাৰিযং, ইদং ৱুচ্চতি ইদ্ধিপাটিহাৰিযং. আলোকসঞ্ঞা ইজ্ঝতীতি – ইদ্ধি. থিনমিদ্ধং পটিহৰতীতি – পাটিহাৰিযং…পে… অৰহত্তমগ্গো ইজ্ঝতীতি – ইদ্ধি. সব্বকিলেসে পটিহৰতীতি – পাটিহাৰিযং. যা চ ইদ্ধি যঞ্চ পাটিহাৰিযং, ইদং ৱুচ্চতি ইদ্ধিপাটিহাৰিযন্তি.

পাটিহাৰিযকথা নিট্ঠিতা.