১০. মাতিকাকথা

৪০. নিচ্ছাতো [নিচ্ছাতো মুচ্চতীতি (স্যা.)], মোক্খো ৱিমোক্খো, ৱিজ্জাৱিমুত্তি, অধিসীলং, অধিচিত্তং, অধিপঞ্ঞা, পস্সদ্ধি, ঞাণং, দস্সনং ৱিসুদ্ধি [সুদ্ধি (স্যা.)] নেক্খম্মং, নিস্সৰণং পৱিৱেকো, ৱোস্সগ্গো, চৰিযা, ঝানৱিমোক্খো, ভাৱনা, অধিট্ঠানং, জীৱিতং.

৪১. নিচ্ছাতোতি নেক্খম্মেন কামচ্ছন্দতো নিচ্ছাতো, অব্যাপাদেন ব্যাপাদতো নিচ্ছাতো…পে… পঠমেন ঝানেন নীৱৰণেহি নিচ্ছাতো…পে… অৰহত্তমগ্গেন সব্বকিলেসেহি নিচ্ছাতো.

মোক্খো ৱিমোক্খোতি নেক্খম্মেন কামচ্ছন্দতো মুচ্চতীতি – মোক্খো ৱিমোক্খো. অব্যাপাদেন ব্যাপাদতো মুচ্চতীতি – মোক্খো ৱিমোক্খো…পে… পঠমেন ঝানেন নীৱৰণেহি মুচ্চতীতি – মোক্খো ৱিমোক্খো…পে… অৰহত্তমগ্গেন সব্বকিলেসেহি মুচ্চতীতি – মোক্খো ৱিমোক্খো.

ৱিজ্জাৱিমুত্তীতি নেক্খম্মং ৱিজ্জতীতি ৱিজ্জা, কামচ্ছন্দতো মুচ্চতীতি ৱিমুত্তি. ৱিজ্জন্তো মুচ্চতি, মুচ্চন্তো ৱিজ্জতীতি – ৱিজ্জাৱিমুত্তি. অব্যাপাদো [অব্যাপাদং (স্যা.)] ৱিজ্জতীতি ৱিজ্জা, ব্যাপাদতো ৱিমুচ্চতীতি ৱিমুত্তি. ৱিজ্জন্তো মুচ্চতি, মুচ্চন্তো ৱিজ্জতীতি – ৱিজ্জাৱিমুত্তি…পে… অৰহত্তমগ্গো ৱিজ্জতীতি ৱিজ্জা, সব্বকিলেসেহি মুচ্চতীতি ৱিমুত্তি. ৱিজ্জন্তো মুচ্চতি, মুচ্চন্তো ৱিজ্জতীতি – ৱিজ্জাৱিমুত্তি.

অধিসীলং অধিচিত্তং অধিপঞ্ঞাতি নেক্খম্মেন কামচ্ছন্দং, সংৱৰট্ঠেন সীলৱিসুদ্ধি, অৱিক্খেপট্ঠেন চিত্তৱিসুদ্ধি, দস্সনট্ঠেন দিট্ঠিৱিসুদ্ধি. যো তত্থ সংৱৰট্ঠো, অযং অধিসীলসিক্খা. যো তত্থ অৱিক্খেপট্ঠো, অযং অধিচিত্তসিক্খা. যো তত্থ দস্সনট্ঠো, অযং অধিপঞ্ঞাসিক্খা. অব্যাপাদেন ব্যাপাদং সংৱৰট্ঠেন সীলৱিসুদ্ধি…পে… অৰহত্তমগ্গেন সব্বকিলেসে সংৱৰট্ঠেন সীলৱিসুদ্ধি, অৱিক্খেপট্ঠেন চিত্তৱিসুদ্ধি. দস্সনট্ঠেন দিট্ঠিৱিসুদ্ধি. যো তত্থ সংৱৰট্ঠো, অযং অধিসীলসিক্খা. যো তত্থ অৱিক্খেপট্ঠো, অযং অধিচিত্তসিক্খা. যো তত্থ দস্সনট্ঠো, অযং অধিপঞ্ঞাসিক্খা.

পস্সদ্ধীতি নেক্খম্মেন কামচ্ছন্দং পটিপ্পস্সম্ভেতি, অব্যাপাদেন ব্যাপাদং পটিপ্পস্সম্ভেতি…পে… অৰহত্তমগ্গেন সব্বকিলেসে পটিপ্পস্সম্ভেতি.

ঞাণন্তি কামচ্ছন্দস্স পহীনত্তা নেক্খম্মং ঞাতট্ঠেন ঞাণং; ব্যাপাদস্স পহীনত্তা অব্যাপাদো ঞাতট্ঠেন ঞাণং…পে… সব্বকিলেসানং পহীনত্তা অৰহত্তমগ্গো ঞাতট্ঠেন ঞাণং.

দস্সনন্তি কামচ্ছন্দস্স পহীনত্তা নেক্খম্মং দিট্ঠত্তা দস্সনং. ব্যাপাদস্স পহীনত্তা অব্যাপাদো দিট্ঠত্তা দস্সনং…পে… সব্বকিলেসানং পহীনত্তা অৰহত্তমগ্গো দিট্ঠত্তা দস্সনং.

ৱিসুদ্ধীতি কামচ্ছন্দং পজহন্তো নেক্খম্মেন ৱিসুজ্ঝতি. ব্যাপাদং পজহন্তো অব্যাপাদেন ৱিসুজ্ঝতি…পে… সব্বকিলেসে পজহন্তো অৰহত্তমগ্গেন ৱিসুজ্ঝতি.

নেক্খম্মন্তি কামানমেতং নিস্সৰণং, যদিদং নেক্খম্মং. ৰূপানমেতং নিস্সৰণং, যদিদং আৰুপ্পং. যং খো পন কিঞ্চি ভূতং সঙ্খতং পটিচ্চসমুপ্পন্নং, নিৰোধো তস্স নেক্খম্মং. ব্যাপাদস্স অব্যাপাদো নেক্খম্মং. থিনমিদ্ধস্স আলোকসঞ্ঞা নেক্খম্মং…পে… সব্বকিলেসানং অৰহত্তমগ্গো নেক্খম্মং.

নিস্সৰণন্তি কামানমেতং নিস্সৰণং, যদিদং নেক্খম্মং. ৰূপানমেতং নিস্সৰণং, যদিদং আৰুপ্পং. যং খো পন কিঞ্চি ভূতং সঙ্খতং পটিচ্চসমুপ্পন্নং, নিৰোধো তস্স নিস্সৰণং. কামচ্ছন্দস্স নেক্খম্মং নিস্সৰণং. ব্যাপাদস্স অব্যাপাদো নিস্সৰণং…পে… সব্বকিলেসানং অৰহত্তমগ্গো নিস্সৰণং.

পৱিৱেকোতি কামচ্ছন্দস্স নেক্খম্মং পৱিৱেকো …পে… সব্বকিলেসানং অৰহত্তমগ্গো পৱিৱেকো.

ৱোস্সগ্গোতি নেক্খম্মেন কামচ্ছন্দং ৱোস্সজ্জতীতি – ৱোস্সগ্গো. অব্যাপাদেন ব্যাপাদং ৱোস্সজ্জতীতি – ৱোস্সগ্গো…পে… অৰহত্তমগ্গেন সব্বকিলেসে ৱোস্সজ্জতীতি – ৱোস্সগ্গো.

চৰিযাতি কামচ্ছন্দং পজহন্তো নেক্খম্মেন চৰতি. ব্যাপাদং পজহন্তো অব্যাপাদেন চৰতি…পে… সব্বকিলেসে পজহন্তো অৰহত্তমগ্গেন চৰতি.

ঝানৱিমোক্খোতি নেক্খম্মং ঝাযতীতি – ঝানং. কামচ্ছন্দং ঝাপেতীতি – ঝানং. ঝাযন্তো মুচ্চতীতি – ঝানৱিমোক্খো. ঝাপেন্তো মুচ্চতীতি – ঝানৱিমোক্খো. ঝাযন্তীতি ধম্মা. ঝাপেন্তীতি কিলেসে. ঝাতে চ ঝাপে চ জানাতীতি – ঝানঝাযী [ঝানৱিমোক্খো (স্যা.) অট্ঠকথা ওলোকেতব্বা]. অব্যাপাদো ঝাযতীতি ঝানং. ব্যাপাদং ঝাপেতীতি – ঝানং…পে… আলোকসঞ্ঞা ঝাযতীতি – ঝানং. থিনমিদ্ধং ঝাপেতীতি – ঝানং…পে… অৰহত্তমগ্গো ঝাযতীতি – ঝানং. সব্বকিলেসে ঝাপেতীতি – ঝানং. ঝাযন্তো মুচ্চতীতি – ঝানৱিমোক্খো. ঝাপেন্তো মুচ্চতীতি – ঝানৱিমোক্খো. ঝাযন্তীতি – ধম্মা. ঝাপেন্তীতি – কিলেসে. ঝাতে চ ঝাপে চ জানাতীতি – ঝানঝাযী.

৪২. ভাৱনা অধিট্ঠানং জীৱিতন্তি কামচ্ছন্দং পজহন্তো নেক্খম্মং ভাৱেতীতি – ভাৱনাসম্পন্নো. নেক্খম্মৱসেন চিত্তং অধিট্ঠাতীতি – অধিট্ঠানসম্পন্নো. স্ৱাযং এৱং ভাৱনাসম্পন্নো অধিট্ঠানসম্পন্নো সমং জীৱতি, নো ৱিসমং; সম্মা জীৱতি, নো মিচ্ছা; ৱিসুদ্ধং জীৱতি, নো কিলিট্ঠন্তি – আজীৱসম্পন্নো. স্ৱাযং এৱং ভাৱনাসম্পন্নো অধিট্ঠানসম্পন্নো আজীৱসম্পন্নো যঞ্ঞদেৱ পৰিসং উপসঙ্কমতি – যদি খত্তিযপৰিসং যদি ব্ৰাহ্মণপৰিসং যদি গহপতিপৰিসং যদি সমণপৰিসং – ৱিসাৰদো উপসঙ্কমতি অমঙ্কুভূতো. তং কিস্স হেতু? তথা হি সো ভাৱনাসম্পন্নো অধিট্ঠানসম্পন্নো আজীৱসম্পন্নো.

ব্যাপাদং পজহন্তো অব্যাপাদং ভাৱেতীতি – ভাৱনাসম্পন্নো…পে… থিনমিদ্ধং পজহন্তো আলোকসঞ্ঞং ভাৱেতীতি – ভাৱনাসম্পন্নো…পে… উদ্ধচ্চং পজহন্তো অৱিক্খেপং ভাৱেতীতি – ভাৱনাসম্পন্নো…পে… ৱিচিকিচ্ছং পজহন্তো ধম্মৱৱত্থানং ভাৱেতীতি – ভাৱনাসম্পন্নো…পে… অৱিজ্জং পজহন্তো ৱিজ্জং ভাৱেতীতি – ভাৱনাসম্পন্নো…পে… অৰতিং পজহন্তো পামোজ্জং ভাৱেতীতি – ভাৱনাসম্পন্নো…পে… নীৱৰণে পজহন্তো পঠমং ঝানং ভাৱেতীতি – ভাৱনাসম্পন্নো…পে… সব্বকিলেসে পজহন্তো অৰহত্তমগ্গং ভাৱেতীতি – ভাৱনাসম্পন্নো. অৰহত্তমগ্গৱসেন চিত্তং অধিট্ঠাতীতি – অধিট্ঠানসম্পন্নো. স্ৱাযং এৱং ভাৱনাসম্পন্নো অধিট্ঠানসম্পন্নো সমং জীৱতি, নো ৱিসমং; সম্মা জীৱতি, নো মিচ্ছা; ৱিসুদ্ধং জীৱতি, নো কিলিট্ঠন্তি – আজীৱসম্পন্নো. স্ৱাযং এৱং ভাৱনাসম্পন্নো অধিট্ঠানসম্পন্নো আজীৱসম্পন্নো যঞ্ঞদেৱ পৰিসং উপসঙ্কমতি – যদি খত্তিযপৰিসং যদি ব্ৰাহ্মণপৰিসং যদি গহপতিপৰিসং যদি সমণপৰিসং – ৱিসাৰদো উপসঙ্কমতি অমঙ্কুভূতো. তং কিস্স হেতু? তথা হি সো ভাৱনাসম্পন্নো অধিট্ঠানসম্পন্নো আজীৱসম্পন্নোতি.

মাতিকাকথা নিট্ঠিতা.

পঞ্ঞাৱগ্গো ততিযো.