৯. মগ্গকথা

২৩৭. মগ্গোতি কেনট্ঠেন মগ্গো? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায [উত্তৰিং পটিৱেধায (স্যা.)] মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

অভিনিৰোপনট্ঠেন সম্মাসঙ্কপ্পো মিচ্ছাসঙ্কপ্পস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

পৰিগ্গহট্ঠেন সম্মাৱাচা মিচ্ছাৱাচায পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

সমুট্ঠানট্ঠেন সম্মাকম্মন্তো মিচ্ছাকম্মন্তস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

ৱোদানট্ঠেন সম্মাআজীৱো মিচ্ছাআজীৱস্স পহানায মগ্গো চেৱ হেতু চ…পে… পগ্গহট্ঠেন সম্মাৱাযামো মিচ্ছাৱাযামস্স পহানায মগ্গো চেৱ হেতু চ…পে… উপট্ঠানট্ঠেন সম্মাসতি মিচ্ছাসতিযা পহানায মগ্গো চেৱ হেতু চ…পে… অৱিক্খেপট্ঠেন সম্মাসমাধি মিচ্ছাসমাধিস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

সকদাগামিমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি ওড়াৰিকস্স কামৰাগসঞ্ঞোজনস্স পটিঘসঞ্ঞোজনস্স ওড়াৰিকস্স কামৰাগানুসযস্স পটিঘানুসযস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

অনাগামিমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি অনুসহগতস্স কামৰাগসঞ্ঞোজনস্স পটিঘসঞ্ঞোজনস্স, অনুসহগতস্স কামৰাগানুসযস্স পটিঘানুসযস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ হেতু চ, নিৰোধে পতিট্ঠাপনায মগ্গো চেৱ হেতু চ.

অৰহত্তমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি ৰূপৰাগস্স অৰূপৰাগস্স মানস্স উদ্ধচ্চস্স অৱিজ্জায, মানানুসযস্স ভৱৰাগানুসযস্স অৱিজ্জানুসযস্স পহানায মগ্গো চেৱ হেতু চ, সহজাতানং ধম্মানং উপত্থম্ভনায মগ্গো চেৱ হেতু চ, কিলেসানং পৰিযাদানায মগ্গো চেৱ হেতু চ, পটিৱেধাদিৱিসোধনায মগ্গো চেৱ হেতু চ, চিত্তস্স অধিট্ঠানায মগ্গো চেৱ হেতু চ, চিত্তস্স, ৱোদানায মগ্গো চেৱ হেতু চ, ৱিসেসাধিগমায মগ্গো চেৱ হেতু চ, উত্তৰি পটিৱেধায মগ্গো চেৱ হেতু চ, সচ্চাভিসমযায মগ্গো চেৱ, হেতু চ, নিৰোধে পতিট্ঠাপনায মগ্গো চেৱ হেতু চ.

দস্সনমগ্গো সম্মাদিট্ঠি, অভিনিৰোপনমগ্গো সম্মাসঙ্কপ্পো, পৰিগ্গহমগ্গো সম্মাৱাচা, সমুট্ঠানমগ্গো সম্মাকম্মন্তো, ৱোদানমগ্গো সম্মাআজীৱো, পগ্গহমগ্গো সম্মাৱাযামো, উপট্ঠানমগ্গো সম্মাসতি, অৱিক্খেপমগ্গো সম্মাসমাধি. উপট্ঠানমগ্গো সতিসম্বোজ্ঝঙ্গো, পৱিচযমগ্গো ধম্মৱিচযসম্বোজ্ঝঙ্গো, পগ্গহমগ্গো ৱীৰিযসম্বোজ্ঝঙ্গো, ফৰণমগ্গো পীতিসম্বোজ্ঝঙ্গো, উপসমমগ্গো পস্সদ্ধিসম্বোজ্ঝঙ্গো, অৱিক্খেপমগ্গো সমাধিসম্বোজ্ঝঙ্গো, পটিসঙ্খানমগ্গো উপেক্খাসম্বোজ্ঝঙ্গো.

অস্সদ্ধিযে অকম্পিযমগ্গো সদ্ধাবলং, কোসজ্জে অকম্পিযমগ্গো ৱীৰিযবলং, পমাদে অকম্পিযমগ্গো সতিবলং, উদ্ধচ্চে অকম্পিযমগ্গো সমাধিবলং, অৱিজ্জায অকম্পিযমগ্গো পঞ্ঞাবলং. অধিমোক্খমগ্গো সদ্ধিন্দ্ৰিযং, পগ্গহমগ্গো ৱীৰিযিন্দ্ৰিযং, উপট্ঠানমগ্গো সতিন্দ্ৰিযং, অৱিক্খেপমগ্গো সমাধিন্দ্ৰিযং, দস্সনমগ্গো পঞ্ঞিন্দ্ৰিযং.

আধিপতেয্যট্ঠেন ইন্দ্ৰিযা মগ্গো, অকম্পিযট্ঠেন বলা মগ্গো, নিয্যানট্ঠেন বোজ্ঝঙ্গা মগ্গো, হেতুট্ঠেন মগ্গঙ্গা মগ্গো, উপট্ঠানট্ঠেন সতিপট্ঠানা মগ্গো, পদহনট্ঠেন সম্মপ্পধানা মগ্গো, ইজ্ঝনট্ঠেন ইদ্ধিপাদা মগ্গো, তথট্ঠেন সচ্চানি মগ্গো, অৱিক্খেপট্ঠেন সমথো মগ্গো, অনুপস্সনট্ঠেন ৱিপস্সনা মগ্গো, একৰসট্ঠেন সমথৱিপস্সনা মগ্গো, অনতিৱত্তনট্ঠেন যুগনদ্ধা মগ্গো, সংৱৰট্ঠেন সীলৱিসুদ্ধি মগ্গো, অৱিক্খেপট্ঠেন চিত্তৱিসুদ্ধি মগ্গো, দস্সনট্ঠেন দিট্ঠিৱিসুদ্ধি মগ্গো, মুত্তট্ঠেন ৱিমোক্খো মগ্গো, পটিৱেধট্ঠেন ৱিজ্জা মগ্গো, পৰিচ্চাগট্ঠেন ৱিমুত্তি মগ্গো, সমুচ্ছেদট্ঠেন খযে ঞাণং মগ্গো, ছন্দো মূলট্ঠেন মগ্গো, মনসিকাৰো সমুট্ঠানট্ঠেন মগ্গো, ফস্সো সমোধানট্ঠেন মগ্গো, ৱেদনা সমোসৰণট্ঠেন মগ্গো, সমাধি পমুখট্ঠেন মগ্গো, সতি আধিপতেয্যট্ঠেন মগ্গো, পঞ্ঞা ততুত্তৰট্ঠেন মগ্গো, ৱিমুত্তি সাৰট্ঠেন মগ্গো, অমতোগধং নিব্বানং পৰিযোসানট্ঠেন মগ্গোতি.

মগ্গকথা নিট্ঠিতা.