১০. মণ্ডপেয্যকথা

২৩৮. ‘‘মণ্ডপেয্যমিদং, ভিক্খৱে, ব্ৰহ্মচৰিযং. সত্থা সম্মুখীভূতো তিধত্তমণ্ডো [তিৱিধো মণ্ডো (বহূসু) অট্ঠকথা ওলোকেতব্বা]. সত্থৰি সম্মুখীভূতে দেসনামণ্ডো, পটিগ্গহমণ্ডো, ব্ৰহ্মচৰিযমণ্ডো’’.

কতমো দেসনামণ্ডো? চতুন্নং অৰিযসচ্চানং আচিক্খনা দেসনা পঞ্ঞাপনা পট্ঠপনা ৱিৱৰণা ৱিভজনা উত্তানীকম্মং [উত্তানিকম্মং (ক.)], চতুন্নং সতিপট্ঠানানং…পে… চতুন্নং সম্মপ্পধানানং… চতুন্নং ইদ্ধিপাদানং… পঞ্চন্নং ইন্দ্ৰিযানং… পঞ্চন্নং বলানং… সত্তন্নং বোজ্ঝঙ্গানং… অৰিযস্স অট্ঠঙ্গিকস্স মগ্গস্স আচিক্খনা দেসনা পঞ্ঞাপনা পট্ঠপনা ৱিৱৰণা ৱিভজনা উত্তানীকম্মং – অযং দেসনামণ্ডো.

কতমো পটিগ্গহমণ্ডো? ভিক্খূ ভিক্খুনিযো উপাসকা উপাসিকাযো দেৱা মনুস্সা যে ৱা পনঞ্ঞেপি কেচি ৱিঞ্ঞাতাৰো – অযং পটিগ্গহমণ্ডো.

কতমো ব্ৰহ্মচৰিযমণ্ডো? অযমেৱ অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি – অযং ব্ৰহ্মচৰিযমণ্ডো.

২৩৯. অধিমোক্খমণ্ডো সদ্ধিন্দ্ৰিযং, অস্সদ্ধিযং কসটো; অস্সদ্ধিযং কসটং ছড্ডেত্ৱা সদ্ধিন্দ্ৰিযস্স অধিমোক্খমণ্ডং পিৱতীতি – মণ্ডপেয্যং. পগ্গহমণ্ডো ৱীৰিযিন্দ্ৰিযং, কোসজ্জং কসটো; কোসজ্জং কসটং ছড্ডেত্ৱা ৱীৰিযিন্দ্ৰিযস্স পগ্গহমণ্ডং পিৱতীতি – মণ্ডপেয্যং. উপট্ঠানমণ্ডো সতিন্দ্ৰিযং, পমাদো কসটো; পমাদং কসটং ছড্ডেত্ৱা সতিন্দ্ৰিযস্স উপট্ঠানমণ্ডং পিৱতীতি – মণ্ডপেয্যং. অৱিক্খেপমণ্ডো সমাধিন্দ্ৰিযং, উদ্ধচ্চং কসটো; উদ্ধচ্চং কসটং ছড্ডেত্ৱা সমাধিন্দ্ৰিযস্স অৱিক্খেপমণ্ডং পিৱতীতি – মণ্ডপেয্যং. দস্সনমণ্ডো পঞ্ঞিন্দ্ৰিযং, অৱিজ্জং কসটো; অৱিজ্জং কসটং ছড্ডেত্ৱা পঞ্ঞিন্দ্ৰিযস্স দস্সনমণ্ডং পিৱতীতি – মণ্ডপেয্যং.

অস্সদ্ধিযে অকম্পিযমণ্ডো সদ্ধাবলং, অস্সদ্ধিযং কসটো; অস্সদ্ধিযং কসটং ছড্ডেত্ৱা সদ্ধাবলস্স অস্সদ্ধিযে অকম্পিযমণ্ডং পিৱতীতি – মণ্ডপেয্যং. কোসজ্জে অকম্পিযমণ্ডো ৱীৰিযবলং, কোসজ্জং কসটো; কোসজ্জং কসটং ছড্ডেত্ৱা ৱীৰিযবলস্স কোসজ্জে অকম্পিযমণ্ডং পিৱতীতি – মণ্ডপেয্যং. পমাদে অকম্পিযমণ্ডো সতিবলং, পমাদো কসটো; পমাদং কসটং ছড্ডেত্ৱা সতিবলস্স পমাদে অকম্পিযমণ্ডং পিৱতীতি – মণ্ডপেয্যং. উদ্ধচ্চে অকম্পিযমণ্ডো সমাধিবলং, উদ্ধচ্চং কসটো; উদ্ধচ্চং কসটং ছড্ডেত্ৱা সমাধিবলস্স উদ্ধচ্চে অকম্পিযমণ্ডং পিৱতীতি – মণ্ডপেয্যং. অৱিজ্জায অকম্পিযমণ্ডো পঞ্ঞাবলং, অৱিজ্জা কসটো; অৱিজ্জং কসটং ছড্ডেত্ৱা পঞ্ঞাবলস্স অৱিজ্জায অকম্পিযমণ্ডং পিৱতীতি – মণ্ডপেয্যং.

উপট্ঠানমণ্ডো সতিসম্বোজ্ঝঙ্গা, পমাদো কসটো; পমাদং কসটং ছড্ডেত্ৱা সতিসম্বোজ্ঝঙ্গস্স উপট্ঠানমণ্ডং পিৱতীতি – মণ্ডপেয্যং. পৱিচযমণ্ডো ধম্মৱিচযসম্বোজ্ঝঙ্গো, অৱিজ্জা কসটো; অৱিজ্জং কসটং ছড্ডেত্ৱা ধম্মৱিচযসম্বোজ্ঝঙ্গস্স পৱিচযমণ্ডং পিৱতীতি – মণ্ডপেয্যং. পগ্গহমণ্ডো ৱীৰিযসম্বোজ্ঝঙ্গো, কোসজ্জং কসটো; কোসজ্জং কসটং ছড্ডেত্ৱা ৱীৰিযসম্বোজ্ঝঙ্গস্স পগ্গহমণ্ডং পিৱতীতি – মণ্ডপেয্যং. ফৰণমণ্ডো পীতিসম্বোজ্ঝঙ্গো, পৰিড়াহো কসটো; পৰিড়াহং কসটং ছড্ডেত্ৱা পীতিসম্বোজ্ঝঙ্গস্স ফৰণমণ্ডং পিৱতীতি – মণ্ডপেয্যং. উপসমমণ্ডো পস্সদ্ধিসম্বোজ্ঝঙ্গো, দুট্ঠুল্লং কসটো; দুট্ঠুল্লং কসটং ছড্ডেত্ৱা পস্সদ্ধিসম্বোজ্ঝঙ্গস্স উপসমমণ্ডং পিৱতীতি – মণ্ডপেয্যং. অৱিক্খেপমণ্ডো সমাধিসম্বোজ্ঝঙ্গো, উদ্ধচ্চং কসটো; উদ্ধচ্চং কসটং ছড্ডেত্ৱা সমাধিসম্বোজ্ঝঙ্গস্স অৱিক্খেপমণ্ডং পিৱতীতি – মণ্ডপেয্যং. পটিসঙ্খানমণ্ডো উপেক্খাসম্বোজ্ঝঙ্গো, অপ্পটিসঙ্খা কসটো; অপ্পটিসঙ্খং কসটং ছড্ডেত্ৱা উপেক্খাসম্বোজ্ঝঙ্গস্স পটিসঙ্খানমণ্ডং পিৱতীতি – মণ্ডপেয্যং.

দস্সনমণ্ডো সম্মাদিট্ঠি, মিচ্ছাদিট্ঠি কসটো; মিচ্ছাদিট্ঠিং কসটং ছড্ডেত্ৱা সম্মাদিট্ঠিযা দস্সনমণ্ডং পিৱতীতি – মণ্ডপেয্যং. অভিনিৰোপনমণ্ডো সম্মাসঙ্কপ্পো, মিচ্ছাসঙ্কপ্পো কসটো; মিচ্ছাসঙ্কপ্পং কসটং ছড্ডেত্ৱা সম্মাসঙ্কপ্পস্স অভিনিৰোপনমণ্ডং পিৱতীতি – মণ্ডপেয্যং. পৰিগ্গহমণ্ডো সম্মাৱাচা, মিচ্ছাৱাচা কসটো; মিচ্ছাৱাচং কসটং ছড্ডেত্ৱা সম্মাৱাচায পৰিগ্গহমণ্ডং পিৱতীতি – মণ্ডপেয্যং. সমুট্ঠানমণ্ডো সম্মাকম্মন্তো, মিচ্ছাকম্মন্তো কসটো; মিচ্ছাকম্মন্তং কসটং ছড্ডেত্ৱা সম্মাকম্মন্তস্স সমুট্ঠানমণ্ডং পিৱতীতি – মণ্ডপেয্যং. ৱোদানমণ্ডো সম্মাআজীৱো, মিচ্ছাআজীৱো কসটো; মিচ্ছাআজীৱং কসটং ছড্ডেত্ৱা সম্মাআজীৱস্স ৱোদানমণ্ডং পিৱতীতি – মণ্ডপেয্যং. পগ্গহমণ্ডো সম্মাৱাযামো, মিচ্ছাৱাযামো কসটো; মিচ্ছাৱাযামং কসটং ছড্ডেত্ৱা সম্মাৱাযামস্স পগ্গহমণ্ডং পিৱতীতি – মণ্ডপেয্যং. উপট্ঠানমণ্ডো সম্মাসতি, মিচ্ছাসতি কসটো; মিচ্ছাসতিং কসটং ছড্ডেত্ৱা সম্মাসতিযা উপট্ঠানমণ্ডং পিৱতীতি – মণ্ডপেয্যং. অৱিক্খেপমণ্ডো সম্মাসমাধি, মিচ্ছাসমাধি কসটো; মিচ্ছাসমাধিং কসটং ছড্ডেত্ৱা সম্মাসমাধিস্স অৱিক্খেপমণ্ডং পিৱতীতি – মণ্ডপেয্যং.

২৪০. অত্থি মণ্ডো, অত্থি পেয্যং, অত্থি কসটো. অধিমোক্খমণ্ডো সদ্ধিন্দ্ৰিযং, অস্সদ্ধিযং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পগ্গহমণ্ডো ৱীৰিযিন্দ্ৰিযং, কোসজ্জং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. উপট্ঠানমণ্ডো সতিন্দ্ৰিযং, পমাদো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. অৱিক্খেপমণ্ডো সমাধিন্দ্ৰিযং, উদ্ধচ্চং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. দস্সনমণ্ডো পঞ্ঞিন্দ্ৰিযং, অৱিজ্জা কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং.

অস্সদ্ধিযে অকম্পিযমণ্ডো সদ্ধাবলং, অস্সদ্ধিযং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. কোসজ্জে অকম্পিযমণ্ডো ৱীৰিযবলং, কোসজ্জং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পমাদে অকম্পিযমণ্ডো সতিবলং, পমাদো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. উদ্ধচ্চে অকম্পিযমণ্ডো সমাধিবলং, উদ্ধচ্চং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. অৱিজ্জায অকম্পিযমণ্ডো পঞ্ঞাবলং, অৱিজ্জা কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং.

উপট্ঠানমণ্ডো সতিসম্বোজ্ঝঙ্গো, পমাদো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পৱিচযমণ্ডো ধম্মৱিচযসম্বোজ্ঝঙ্গো, অৱিজ্জা কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পগ্গহমণ্ডো ৱীৰিযসম্বোজ্ঝঙ্গো, কোসজ্জং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. ফৰণমণ্ডো পীতিসম্বোজ্ঝঙ্গো, পৰিড়াহো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. উপসমমণ্ডো পস্সদ্ধিসম্বোজ্ঝঙ্গো, দুট্ঠুল্লং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. অৱিক্খেপমণ্ডো সমাধিসম্বোজ্ঝঙ্গো, উদ্ধচ্চং কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পটিসঙ্খানমণ্ডো উপেক্খাসম্বোজ্ঝঙ্গো, অপটিসঙ্খা কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং.

দস্সনমণ্ডো সম্মাদিট্ঠি, মিচ্ছাদিট্ঠি কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. অভিনিৰোপনমণ্ডো সম্মাসঙ্কপ্পো, মিচ্ছাসঙ্কপ্পো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পৰিগ্গহমণ্ডো সম্মাৱাচা, মিচ্ছাৱাচা কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. সমুট্ঠানমণ্ডো সম্মাকম্মন্তো, মিচ্ছাকম্মন্তো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. ৱোদানমণ্ডো সম্মাআজীৱো, মিচ্ছাআজীৱো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. পগ্গহমণ্ডো সম্মাৱাযামো, মিচ্ছাৱাযামো কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. উপট্ঠানমণ্ডো সম্মাসতি, মিচ্ছাসতি কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং. অৱিক্খেপমণ্ডো সম্মাসমাধি, মিচ্ছাসমাধি কসটো; যো তত্থ অত্থৰসো ধম্মৰসো ৱিমুত্তিৰসো – ইদং পেয্যং.

দস্সনমণ্ডো সম্মাদিট্ঠি… অভিনিৰোপনমণ্ডো সম্মাসঙ্কপ্পো… পৰিগ্গহমণ্ডো সম্মাৱাচা… সমুট্ঠানমণ্ডো সম্মাকম্মন্তো… ৱোদানমণ্ডো সম্মাআজীৱো… পগ্গহমণ্ডো সম্মাৱাযামো… উপট্ঠানমণ্ডো সম্মাসতি… অৱিক্খেপমণ্ডো সম্মাসমাধি.

উপট্ঠানমণ্ডো সতিসম্বোজ্ঝঙ্গো… পৱিচযমণ্ডো ধম্মৱিচযসম্বোজ্ঝঙ্গো… পগ্গহমণ্ডো ৱীৰিযসম্বোজ্ঝঙ্গো… ফৰণমণ্ডো পীতিসম্বোজ্ঝঙ্গো… উপসমমণ্ডো পস্সদ্ধিসম্বোজ্ঝঙ্গো… অৱিক্খেপমণ্ডো সমাধিসম্বোজ্ঝঙ্গো… পটিসঙ্খানমণ্ডো উপেক্খাসম্বোজ্ঝঙ্গো.

অস্সদ্ধিযে অকম্পিযমণ্ডো সদ্ধাবলং… কোসজ্জে অকম্পিযমণ্ডো ৱীৰিযবলং… পমাদে অকম্পিযমণ্ডো সতিবলং… উদ্ধচ্চে অকম্পিযমণ্ডো সমাধিবলং… অৱিজ্জায অকম্পিযমণ্ডো পঞ্ঞাবলং.

অধিমোক্খমণ্ডো সদ্ধিন্দ্ৰিযং… পগ্গহমণ্ডো ৱীৰিযিন্দ্ৰিযং… উপট্ঠানমণ্ডো সতিন্দ্ৰিযং… অৱিক্খেপমণ্ডো সমাধিন্দ্ৰিযং… দস্সনমণ্ডো পঞ্ঞিন্দ্ৰিযং.

আধিপতেয্যট্ঠেন ইন্দ্ৰিযা মণ্ডো, অকম্পিযট্ঠেন বলা মণ্ডো, নিয্যানট্ঠেন বোজ্ঝঙ্গা মণ্ডো, হেতুট্ঠেন মগ্গো মণ্ডো, উপট্ঠানট্ঠেন সতিপট্ঠানা মণ্ডো, পদহনট্ঠেন সম্মপ্পধানা মণ্ডো, ইজ্ঝনট্ঠেন ইদ্ধিপাদা মণ্ডো, তথট্ঠেন সচ্চা মণ্ডো, অৱিক্খেপট্ঠেন সমথো মণ্ডো, অনুপস্সনট্ঠেন ৱিপস্সনা মণ্ডো, একৰসট্ঠেন সমথৱিপস্সনা মণ্ডো, অনতিৱত্তনট্ঠেন যুগনদ্ধা মণ্ডো, সংৱৰট্ঠেন সীলৱিসুদ্ধি মণ্ডো, অৱিক্খেপট্ঠেন চিত্তৱিসুদ্ধি মণ্ডো, দস্সনট্ঠেন দিট্ঠিৱিসুদ্ধি মণ্ডো, মুত্তট্ঠেন ৱিমোক্খো মণ্ডো, পটিৱেধট্ঠেন ৱিজ্জা মণ্ডো, পৰিচ্চাগট্ঠেন ৱিমুত্তি মণ্ডো, সমুচ্ছেদট্ঠেন খযে ঞাণং মণ্ডো, পটিপ্পস্সদ্ধট্ঠেন অনুপ্পাদে ঞাণং মণ্ডো, ছন্দো মূলট্ঠেন মণ্ডো, মনসিকাৰো সমুট্ঠানট্ঠেন মণ্ডো, ফস্সো সমোধানট্ঠেন মণ্ডো, ৱেদনা সমোসৰণট্ঠেন মণ্ডো, সমাধি পমুখট্ঠেন মণ্ডো, সতি আধিপতেয্যট্ঠেন মণ্ডো, পঞ্ঞা ততুত্তৰট্ঠেন মণ্ডো, ৱিমুত্তি সাৰট্ঠেন মণ্ডো, অমতোগধং নিব্বানং পৰিযোসানট্ঠেন মণ্ডোতি.

চতুত্থভাণৱাৰো.

মণ্ডপেয্যকথা নিট্ঠিতা.

মহাৱগ্গো পঠমো.