৮. ৱিপল্লাসকথা

২৩৬. পুৰিমনিদানং. ‘‘চত্তাৰোমে, ভিক্খৱে [অ. নি. ৪.৪৯ পস্সিতব্বা], সঞ্ঞাৱিপল্লাসা চিত্তৱিপল্লাসা দিট্ঠিৱিপল্লাসা. কতমে চত্তাৰো? অনিচ্চে, ভিক্খৱে, নিচ্চন্তি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো. দুক্খে, ভিক্খৱে, সুখন্তি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো. অনত্তনি, ভিক্খৱে, অত্তাতি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো. অসুভে, ভিক্খৱে, সুভন্তি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো. ইমে খো, ভিক্খৱে, চত্তাৰো সঞ্ঞাৱিপল্লাসা চিত্তৱিপল্লাসা দিট্ঠিৱিপল্লাসা.

‘‘চত্তাৰোমে, ভিক্খৱে, নসঞ্ঞাৱিপল্লাসা নচিত্তৱিপল্লাসা নদিট্ঠিৱিপল্লাসা. কতমে চত্তাৰো? অনিচ্চে, ভিক্খৱে, অনিচ্চন্তি নসঞ্ঞাৱিপল্লাসো নচিত্তৱিপল্লাসো নদিট্ঠিৱিপল্লাসো. দুক্খে, ভিক্খৱে, দুক্খন্তি নসঞ্ঞাৱিপল্লাসো নচিত্তৱিপল্লাসো নদিট্ঠিৱিপল্লাসো. অনত্তনি, ভিক্খৱে, অনত্তাতি নসঞ্ঞাৱিপল্লাসো নচিত্তৱিপল্লাসো নদিট্ঠিৱিপল্লাসো. অসুভে, ভিক্খৱে, অসুভন্তি নসঞ্ঞাৱিপল্লাসো নচিত্তৱিপল্লাসো নদিট্ঠিৱিপল্লাসো. ইমে খো, ভিক্খৱে, চত্তাৰো নসঞ্ঞাৱিপল্লাসা নচিত্তৱিপল্লাসা নদিট্ঠিৱিপল্লাসা’’তি.

‘‘অনিচ্চে নিচ্চসঞ্ঞিনো, দুক্খে চ সুখসঞ্ঞিনো;

অনত্তনি চ অত্তাতি [অত্তসঞ্ঞিনো (স্যা.) অ. নি. ৪.৪৯ পস্সিতব্বা], অসুভে সুভসঞ্ঞিনো;

মিচ্ছাদিট্ঠিহতা সত্তা, খিত্তচিত্তা ৱিসঞ্ঞিনো.

‘‘তে যোগযুত্তা মাৰস্স, অযোগক্খেমিনো জনা;

সত্তা গচ্ছন্তি সংসাৰং, জাতিমৰণগামিনো.

‘‘যদা চ বুদ্ধা লোকস্মিং, উপ্পজ্জন্তি পভঙ্কৰা;

তে ইমং ধম্মং পকাসেন্তি, দুক্খূপসমগামিনং.

‘‘তেসং সুত্ৱান সপ্পঞ্ঞা, সচিত্তং পচ্চলদ্ধু [পচ্চলদ্ধুং (স্যা.), পচ্চলদ্ধা অ. নি. ৪.৪৯] তে;

অনিচ্চং অনিচ্চতো দক্খুং, দুক্খমদ্দক্খু দুক্খতো.

‘‘অনত্তনি অনত্তাতি, অসুভং অসুভতদ্দসুং;

সম্মাদিট্ঠিসমাদানা, সব্বং দুক্খং উপচ্চগু’’ন্তি.

ইমে চত্তাৰো ৱিপল্লাসা দিট্ঠিসম্পন্নস্স পুগ্গলস্স পহীনা, অপ্পহীনাতি. কেচি পহীনা, কেচি অপ্পহীনা? অনিচ্চে নিচ্চন্তি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো পহীনো. দুক্খে সুখন্তি সঞ্ঞা উপ্পজ্জতি, চিত্তং উপ্পজ্জতি, দিট্ঠিৱিপল্লাসো পহীনো. অনত্তনি অত্তাতি সঞ্ঞাৱিপল্লাসো চিত্তৱিপল্লাসো দিট্ঠিৱিপল্লাসো পহীনো. অসুভে সুভন্তি সঞ্ঞা উপ্পজ্জতি, চিত্তং উপ্পজ্জতি, দিট্ঠিৱিপল্লাসো পহীনো. দ্ৱীসু ৱত্থূসু ছ ৱিপল্লাসা পহীনা. দ্ৱীসু ৱত্থূসু দ্ৱে ৱিপল্লাসা পহীনা, চত্তাৰো ৱিপল্লাসা অপ্পহীনা. চতূসু ৱত্থূসু অট্ঠ ৱিপল্লাসা পহীনা, চত্তাৰো ৱিপল্লাসা অপ্পহীনাতি.

ৱিপল্লাসকথা নিট্ঠিতা.