১. উদ্দেসো

২০৯. পুৰিমনিদানং. ‘‘তযোমে, ভিক্খৱে, ৱিমোক্খা. কতমে তযো? সুঞ্ঞতো ৱিমোক্খো, অনিমিত্তো ৱিমোক্খো, অপ্পণিহিতো ৱিমোক্খো – ইমে খো, ভিক্খৱে, তযো ৱিমোক্খা.

‘‘অপি চ, অট্ঠসট্ঠি ৱিমোক্খা – সুঞ্ঞতো ৱিমোক্খো, অনিমিত্তো ৱিমোক্খো, অপ্পণিহিতো ৱিমোক্খো; অজ্ঝত্তৱুট্ঠানো ৱিমোক্খো, বহিদ্ধাৱুট্ঠানো ৱিমোক্খো, দুভতো ৱুট্ঠানো ৱিমোক্খো; অজ্ঝত্তৱুট্ঠানা চত্তাৰো ৱিমোক্খা, বহিদ্ধাৱুট্ঠানা চত্তাৰো ৱিমোক্খা, দুভতো ৱুট্ঠানা চত্তাৰো ৱিমোক্খা; অজ্ঝত্তৱুট্ঠানানং অনুলোমা চত্তাৰো ৱিমোক্খা, বহিদ্ধাৱুট্ঠানানং অনুলোমা চত্তাৰো ৱিমোক্খা, দুভতো ৱুট্ঠানানং অনুলোমা চত্তাৰো ৱিমোক্খা; অজ্ঝত্তৱুট্ঠানপটিপ্পস্সদ্ধী [অজ্ঝত্তৱুট্ঠানা পটিপ্পস্সদ্ধী (স্যা.)] চত্তাৰো ৱিমোক্খা, বহিদ্ধাৱুট্ঠানপটিপ্পস্সদ্ধী চত্তাৰো ৱিমোক্খা, দুভতো ৱুট্ঠানপটিপ্পস্সদ্ধী চত্তাৰো ৱিমোক্খা; ৰূপী ৰূপানি পস্সতীতি ৱিমোক্খো, অজ্ঝত্তং অৰূপসঞ্ঞী বহিদ্ধা ৰূপানি পস্সতীতি ৱিমোক্খো, সুভং তেৱ অধিমুত্তো হোতীতি ৱিমোক্খো; আকাসানঞ্চাযতনসমাপত্তি ৱিমোক্খো, ৱিঞ্ঞাণঞ্চাযতনসমাপত্তি ৱিমোক্খো, আকিঞ্চঞ্ঞাযতনসমাপত্তি ৱিমোক্খো; নেৱসঞ্ঞানাসঞ্ঞাযতনসমাপত্তি ৱিমোক্খো, সঞ্ঞাৱেদযিতনিৰোধসমাপত্তি ৱিমোক্খো; সমযৱিমোক্খো, অসমযৱিমোক্খো; সামযিকো ৱিমোক্খো, অসামযিকো ৱিমোক্খো; কুপ্পো ৱিমোক্খো, অকুপ্পো ৱিমোক্খো; লোকিযো ৱিমোক্খো, লোকুত্তৰো ৱিমোক্খো; সাসৱো ৱিমোক্খো, অনাসৱো ৱিমোক্খো; সামিসো ৱিমোক্খো, নিৰামিসো ৱিমোক্খো; নিৰামিসানিৰামিসতৰো ৱিমোক্খো, পণিহিতো ৱিমোক্খো, অপ্পণিহিতো ৱিমোক্খো, পণিহিতপ্পটিপ্পস্সদ্ধি ৱিমোক্খো; সঞ্ঞুত্তো ৱিমোক্খো, ৱিসঞ্ঞুত্তো ৱিমোক্খো; একত্তৱিমোক্খো, নানত্তৱিমোক্খো, সঞ্ঞাৱিমোক্খো, ঞাণৱিমোক্খো; সীতিসিযাৱিমোক্খো [সীতীসিযাৱিমোক্খো (সী. অট্ঠ.)], ঝানৱিমোক্খো, অনুপাদাচিত্তস্স ৱিমোক্খো’’.