১. গণনৱাৰ

১৫২. সোড়সৱত্থুকং আনাপানস্সতিসমাধিং [আনাপানসতিসমাধিং (সী. অট্ঠ.)] ভাৱযতো সমাধিকানি দ্ৱে ঞাণসতানি উপ্পজ্জন্তি – অট্ঠ পৰিপন্থে [পৰিবন্ধে (ক.)] ঞাণানি, অট্ঠ চ উপকাৰে ঞাণানি, অট্ঠাৰস উপক্কিলেসে ঞাণানি, তেৰস ৱোদানে ঞাণানি, বাত্তিংস সতোকাৰিস্স [সতোকাৰীসু (স্যা.)] ঞাণানি, চতুৱীসতি সমাধিৱসেন ঞাণানি, দ্ৱেসত্ততি ৱিপস্সনাৱসেন ঞাণানি, অট্ঠ নিব্বিদাঞাণানি, অট্ঠ নিব্বিদানুলোমঞাণানি, অট্ঠ নিব্বিদাপটিপ্পস্সদ্ধিঞাণানি, একৱীসতি ৱিমুত্তিসুখে ঞাণানি.

কতমানি অট্ঠ পৰিপন্থে ঞাণানি, অট্ঠ চ উপকাৰে ঞাণানি? কামচ্ছন্দো সমাধিস্স পৰিপন্থো, নেক্খম্মং সমাধিস্স উপকাৰং. ব্যাপাদো সমাধিস্স পৰিপন্থো, অব্যাপাদো সমাধিস্স উপকাৰং. থিনমিদ্ধং সমাধিস্স পৰিপন্থো, আলোকসঞ্ঞা সমাধিস্স উপকাৰং. উদ্ধচ্চং সমাধিস্স পৰিপন্থো, অৱিক্খেপো সমাধিস্স উপকাৰং. ৱিচিকিচ্ছা সমাধিস্স পৰিপন্থো, ধম্মৱৱত্থানং সমাধিস্স উপকাৰং. অৱিজ্জা সমাধিস্স পৰিপন্থো, ঞাণং সমাধিস্স উপকাৰং. অৰতি সমাধিস্স পৰিপন্থো, পামোজ্জং সমাধিস্স উপকাৰং. সব্বেপি অকুসলা ধম্মা সমাধিস্স পৰিপন্থা, সব্বেপি কুসলা ধম্মা সমাধিস্স উপকাৰা. ইমানি অট্ঠ পৰিপন্থে ঞাণানি, অট্ঠ চ উপকাৰে ঞাণানি.

গণনৱাৰো পঠমো.